Follow @khasokhasmag

आँधीबाट बहामसमा १३ हजार घर ध्वस्त, आज अमेरिका मुख्यभूमि छिर्दै


प्रकाशित मिति : भाद्र १६, २०७६ सोमबार

विनाशकारी आँधी डोरियनले बहामसमा झण्डै १३ हजार घरमा क्षति पुर्याएको छ । रेडक्रसका अनुशार बहामसमा आँधीका कारण कम्तीमा १३ हजार घरहरुमा क्षति पुगेको छ । तीमध्ये केही घरहरु ध्वस्त भएका छन् भने केहीमा नराम्रो क्षति पुगेको छ ।

आँधीका कारण अबाको आयल्याण्डमा ७ बर्षको बच्चाको निधन भएको छ भने उनकी बहिनी हराइरहेको जनाइएको छ । आँधीका कारण सबैभन्दा जनघनत्व भएकोमध्येको एक न्यु प्रोभिडेन्समा सम्पूर्णरुपमा विद्युत आपूर्तिमा अवरोध आएको छ । बहामसका प्रधानमन्त्रीले यो समय प्राथना र उद्दारको भएको बताएका छन् ।

बहामसमा आँधीका कारण इन्सुरेन्स उद्योगमा २५ बिलियनको क्षति पुगेको छ ।

आँधी आज दिउसो अमेरिकाको मुख्यभूमि फ्लोरिडामा प्रवेश गर्ने जनाइएको छ । आँधीले प्रभाव पार्नसक्ने सम्भावित क्षेत्रमा बस्नेहरुलाई आज अपरान्हसम्म उक्त स्थान छाडेर सुरक्षित स्थलतर्फ लाग्न स्थानीय सरकारहरुले चेतावनी दिएका छन् ।

फ्लोरिया, जर्जिया र साउथ क्यारोलिनाका १९ वटा काउन्टीका बासिन्दालाई उक्त स्थान अनिवार्यरुपमा छाडेर सुरक्षित स्थानमा लाग्न चेतावनी दिइएको छ । फ्लोरिडाका ८ काउन्टीका बासिन्दालाई भने स्वेच्छिक रुपमा स्थान छाड्न भनिएको छ । साउथ क्यारोलिना र जर्जियाका गभर्नरले आफूहरुले सबैलाई खुशी राख्न नसकेपनि सबैलाई सुरक्षित राख्न सकिनेमा आफूहरु विश्वस्त रहेको बताएका छन् ।

विनाशकारी आँधी डोरियन आइतबार बहामसमा प्रवेश गरेसँगै प्रलयकारी वितण्डा सुरु गरेको थियो । आइतबार विहानै १८५ माइल प्रतिघण्टाको गतिमा आएको उक्त आँधी पछि १७० माइल प्रतिघण्टाको गतिमा झरेको थियो । आँधी निकै सुस्त गतिमा अगाडि बढिरहेको छ ।

यो आँधी एटलान्टिकमा आएको अमेरिकी इतिहासकै दोश्रो ठूलो आँधी रहेको जनाइएको छ । यसअगाडि सन् १९८० मा एलेन नामको बलियो आँधी आएको थियो, जुन प्रतिघण्टा १९० माइलको गतिमा रहेको थियो ।

आँधीका कारण बहामसमा भवनहरु भत्किएको जनाएको छ भने कैयन स्थानमा पहिरो गएको छ । एल्बो के, म्यान ओ वार, मार्स हार्वर लगायतका क्षेत्रमा कैयन घरहरु डूबानमा परेका छन् । उत्तरी बहामसबाट भने क्षतिको कुनै विवरण प्राप्त भएको छैन ।

डोरियन आँधीका कारण सोमबार दिउसो फ्लोरिडाका विमानस्थलहरु बन्द गरिने भएको छ । आँधीका कारण ओल्र्याण्डो मेलबर्न इन्टरनेशनल एयरपोर्ट र फोर्ट लाउडरडेल हलिउड इन्टनेशनल एयरपोर्टले सोमबार दिउसो ब्यापारिक उडान र टर्मिनलहरु बन्द गर्ने घोषणा गरेका छन् ।

अहिलेसम्म ती विमानस्थलबाट उड्ने र अवतरण गर्ने सयौं उडानहरु स्थगित गरिएका छन् । आँधीका कारण फ्लोरिडामा कैयन विमानहरुले यात्रुहरुलाई विना थप शुल्क टिकटहरु परिवर्तन गर्ने सुविधा समेत दिएका छन् ।

आँधी खतराका हिसाबले अधिक खतरनाक अर्थात् पाँचौं श्रेणीको रहेको जनाइएको छ । सबैभन्दा कम खतरनाक आँधी पहिलो श्रेणीको हुनेगर्छ भने आँधीको गतिसँगै श्रेणीपनि बढ्दै जान्छ । १५७ माइल प्रतिघण्टा वा त्योभन्दा माथिको आँधी पाँचौं श्रेणीको मानिन्छ ।

मंगलबार आँधीको गति प्रतिघण्टा १४० माइलमा झर्ने अनुमान गरिएको छ । बुधबारपनि आँधीको गति तीब्र नै रहने जनाइएको छ । जर्जिया, साउथ क्यारोलिना र नर्थ क्यारोलिनामा आँधीको प्रभाव पर्ने अनुमान गरिएको छ । बिहिबार आँधीले क्यारोलाइना क्षेत्रमा पहिरो समेत जानसक्ने मौसमविदहरुले चेतावनी दिएका छन् । शुक्रबार नर्थ क्यारोलिनाको सामुन्द्रीक किनारहुँदै आँधी बाहिरिने अनुमान गरिएको छ ।

आँधीको समयमा घरभित्रै बस्न, झ्यालढोकाहरु प्लाइउडले संरक्षण गर्न, ताजा अपडेटका लागि स्थानीय रेडियो टेलिभिजन हेर्न, मोबाइल रेडक्रसको आपतकालिक एप्लिकेशन डाउनलोड गर्न, हरिकेन बत्ति राख्न, आफ्ना घरपालुवा जनावरमा पहिचान खुल्ने ट्याग लगाइदिन, स्थानीय आपतकालिन सेल्टरहरु खोज्न, प्लास्टिकका बोतलहरु पानीले भरेर राख्न सुझाव दिइएको छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com