निर्दोष ५ जना किशोरलाई मृत्युदण्डको माग गरेका ट्रम्प नेटफिल्क्सि सिरिजका कारण विवादित
प्रकाशित मिति : जेष्ठ २४, २०७६ शुक्रबार
सन् १९८९ मा न्युयोर्कको सेन्ट्रल पार्कमा एकजना युवतीको बलात्कार र आक्रमण भएको सत्य घटनामा आधारित नेटफिल्क्सिले बनाएको एउटा चलचित्रका कारण अमेरिकी राष्ट्रपति डोनाल्ड ट्रम्प विवादमा परेका छन् । उक्त घटनाका सन्दर्भमा ट्रम्पको भूमिकालाई लिएर प्रश्नचिन्ह खडा गरिएको हो ।
उक्त घटनामा पाँचजना अश्वेत टिनएजरहरुलाई पक्राउ गरेर गलत तरिकाले दोषी सावित गर्दै जेल हालिएको थियो । तर पछि सन् २००२ मा घटनामा संलग्न व्यक्तिबारे डीएनए रेकर्ड सहित पुष्टी भएपछि पाँचजना किशोरहरु निर्दोष रहेको पुष्टी भएको थियो ।
उक्त घटनामा डोनाल्ड ट्रम्पले न्युयोर्क टाइम्स लगायतका पत्रिकामा ८५ हजार डलर खर्चेर विज्ञापन गर्दै ती पाँचजना किशोरहरुलाई मृत्युदण्डको माग गरेका थिए । तर ती किशोरहरु पछि निर्दोष ठहरिए । सन् २०१४ मा संघीय अदालतले ती किशोरहरुलाई न्युयोर्क सिटीका तर्फबाट ४१ मिलियन डलर क्षतिपूर्ति दिलाउने फैसला गरेका थिए । ट्रम्पले अदालतको यो फैसलालाई समेत लज्जास्पद भन्दै न्युयोर्क डेली न्युजमा निर्दोष पाँचजनाको बिरुद्ध लेख लेखेका थिए ।
नेटफिल्क्सिको नयाँ सिरिज ह्वेन दे सि असमा घटनाबारे ट्रम्पको प्रतिकृया समेत देखाइएको छ । मे १७, १९८९ मा ट्रम्पले ल्यारी किंगलाई अन्तरवार्ता दिंदै आफूले न्युयोर्कका पत्रिकामा मृत्युदण्डको माग गर्दै दिएको विज्ञापनबारे कुरा गरेका थिए ।