अर्का टिनएजरलाई मृत्युदण्डको प्रयासमा साउदी सरकार
प्रकाशित मिति : जेष्ठ २४, २०७६ शुक्रबार
साउदी अरबमा एकजना टिनएजरले सरकारबिरोधी प्रदर्शन गरेको अभियोगमा मृत्युदण्डको सजायको सामना गरिरहेका छन् । १३ बर्षको उमेरमा सन् २०१४ मा पक्राउ परेका मुर्ताजा कुरैसीलाई साउदी सरकारले मृत्युदण्डको सजाय दिन चाहेको जनाइएको छ ।
सन् २०११ को अरब स्प्रींगताका मानवअधिकारको माग गरेको अभियोगमा उनलाई त्यसको तीनबर्षपछि पक्राउ गरिएको थियो । सन् २०११ मा एउटा सानो साइकल र्यालीमा देखिएका उनी त्यतीबेला जम्मा १० बर्षका थिए ।
झण्डै ४ बर्षसम्म हिराशतमा राखेर पूर्व सुनुवाई गरिएका उनी हाल १८ बर्षका भएका छन् । उनलाई अधिकारकर्मी दाजु अली कुरैसीलाई साथ दिएको अभियोग लगाइएको छ । मुर्तजा कुरैसीका दाजु अली कुरैसी सरकारबिरोधी प्रदर्शनका क्रममा मारिएका थिए ।
विश्वमै उच्च मृत्युदण्डको दर रहेको साउदी अरबमा बाल्यकालमा अपराध गरेकाहरुलाई समेत मृत्युदण्ड दिने गरिएको भन्दै कडा आलोचना हुने गरेको छ ।
गत अप्रिलमा मात्र साउदी अरबले ३७ जनालाई मृत्युदण्डको सजाय दिएको घोषणा गरेको थियो । कुरैसीलाई अहिले आतंकवाद सम्बन्धि मुद्दा हेर्ने अदालतमा पेश गरिएको छ, जहाँ उनलाई अतिवादी आतंकवादी संगठनसँग साँठगाँठ रहेको अभियोग लगाइएको छ । कुरैसीले आफूबिरुद्ध लगाइएका अभियोगहरु अस्वीकार गरेका छन् ।
साउदी अरेबियाले संयुक्त राष्ट्रसंघ समक्ष पनि बाल्कायलमा अपराध गरेकाहरुलाई मृत्यु दण्ड नदिने प्रतिबद्धता जनाएको थियो ।