‘म ट्रम्पलाई जेलभित्र देख्न चाहन्छु’ – पेलोसी
प्रकाशित मिति : जेष्ठ २३, २०७६ बिहीबार
अमेरिकाको प्रतिनिधिसभाकी सभामुख न्यान्सी पेलोसीले अमेरिकी राष्ट्रपति डोनाल्ड ट्रम्प जेलभित्र रहेको आफूले हेर्न चाहेको बताएकी छिन् । सिनियर डेमोक्र्याटहरुसँग कुरा गर्दै उनले ट्रम्पबिरुद्ध महाअभियोग होइन, जेलमा हाल्ने कदम आवश्यक रहेको बताएकी हुन् ।
पेलोसीले ट्रम्पलाई महाअभियोग नभई जेलमा रहेको हेर्न चाहेको बताएको पोलिटिकोले समाचार प्रकाशित गरेको छ । मंगलबार राती प्रतिनिधिसभाको न्यायायिक कमिटिका अध्यक्ष जेरी नाड्लरले महाअभियोगबारे सोधेको विषयमा पेलोसीले यस्तो टिप्पणी गरेकी हुन् ।
पेलोसीले भनिन् – ‘म उनबिरुद्ध महाअभियोग लागेको होइन, उनी जेल परेको हेर्न चाहन्छु ।’
पेलोसीले नाड्लरसहित अन्य उच्च डेमोक्र्याटहरुलाई पनि भेटेकी थिइन्, जो राष्ट्रपति ट्रम्पबिरुद्धका अनुसन्धानहरुमा आक्रमक तरिकाले लागिपरेका छन् । नाडलरले ट्रम्पबिरुद्धको महाअभियोग सोधपुछ सुरुवात गर्नका लागि आफ्नो कमिटिलाई अनुमति दिन पेलोसीसमक्ष अनुरोध गरेका थिए ।
पेलोसी भने ट्रम्पलाई महाअभियोग लगाउने नभई उनबिरुद्धका अभियोगहरु प्रमाणित गराएर जेल हाल्नुपर्ने पक्षमा रहेकी छिन् ।