जापानमा विश्वविद्यालयका प्राध्यापकलाई धूमपान गर्न प्रतिबन्ध
प्रकाशित मिति : बैशाख १२, २०७६ बिहीबार
जापानमा धूम्रपान गर्ने प्राध्यापकलाई विश्वविद्यालयमा भर्ना गर्न रोक लागेको छ । आउँदै गरेको २०२० ओलम्पिक्सका लागि जापानमा धूम्रपान विरोधी अभियान कार्यक्रमहरु चलेका कारण यस्तो रोक लगाइएको हो ।
विश्वविद्यालयले धूम्रपान गर्ने कुनै पनि शिक्षक कर्मचारीलाई भर्ना गर्न रोक लगाएको र पदभार सम्हाल्नुअघि यो बानि त्याग्ने आवेदकले भने जागिर पाउन सक्ने सम्भावना रहेको नागाशाकी युनिभर्सिटिका प्रवक्ता युसुके ताकाकुराले बताएका छन् । साथै युनिभर्सिसिटले पुरै क्याम्पस हाताभित्रै नै धूम्रपान निषेध गर्ने र धूम्रपान छोड्न नसक्नेका लागि क्लिनिक पनि खोलिने ताकाकुराले जानकारी दिए ।
शैक्षिक क्षेत्र धूम्रपान गर्नेहरुका लागि सहि स्थान नभएका कारण यस्तो नियम ल्याइएको बताइएको छ । टोकियोको सिटि सरकारले २०२० समर गेम्सअघि कडा खालको धूम्रपान विरोधी नियम पारित गरेपछि रोजगारीका लागि यस्तो शर्त राख्ने नागाशाकी नै पहिलो राज्य नियन्त्रित युनिभर्सिटि भएको स्थानीय सञ्चार माध्यमहरुले बताएका छन् । जापानका अधिकांश रेष्टुराँ र बारहरुमा धूम्रपान गर्न अनुमति पाइने भएकाले यसलाई धूम्रपान गर्नेहरुको स्वर्ग कै रुपमा पनि लिने गरिन्थ्यो । नयाँ कानूनले भने राजधानीका जुनसुकै रेष्टुराँमा पनि धूम्रपानलाई मान्यता दिँदैन । रेष्टुराँले धूम्रपानका लागि छुट्टै स्थानको भने व्यवस्था गर्न सक्छ । त्यस्तै स्कूलमा पनि धूम्रपान पूर्णतयाः निषेध छ ।