५० बर्ष अगाडि डिभोर्स गरेका पतिलाई डेढलाख डलर जरिवाना
प्रकाशित मिति : चैत्र १३, २०७५ बुधबार
अमेरिकाको सान डिएगोमा ५० बर्ष अगाडि डिभोर्स गरेका पतिले पत्नीलाई बच्चाबच्चीको हेरचाहका लागि डेढलाख डलर तिर्नुपर्ने भएको छ । हाल ७४ बर्षको उमेर भइसकेकी टोनी एण्डरसन र डोन लेनहर्टबीच सन् १९६६ मा विवाह भएको थियो ।
विवाहको साढे २ बर्षपछि उनीहरु छुट्एिका थिए भने सन् १९७० को मध्यमा डिभोर्स भएको थियो । त्यतीबेला उनीहरुकी ३ बर्षकी छोरी लेन थिइन् ।
छोरी हुर्काउनका लागि पतिले साढे २ बर्षसम्म हरेक महिना २१० डलर पत्नीलाई दिनुपर्ने फैसला गरेको थियो । त्यसपछि छोरी १८ बर्ष नपुग्दासम्म हरेक महिना १६० डलर तिर्नुपर्ने व्यवस्था गरिएको थियो ।
तर लेनहर्टले त्यो रकम कहिले पनि तिरेनन् । यो अवधिमा मुल रकम ३० हजार र १० प्रतिशत ब्याज सहित लेनहर्टले तिर्नुपर्ने रकम डेढलाख पुगेको छ ।
लेनहर्ट दिएको पहिलो चेक बाउन्स भएको थियो भने त्यसपछि उनी केटी साथीलाई लिएर क्यानडा बेपत्ता भएका थिए । गत बर्ष एण्डरसनले आफ्नो पूर्वपतिको बारेमा गुगलमा पत्ता लगाइन् । त्यसपछि उनले गत महिना अदालतमा मुद्दा दायर गरेकी थिइन् ।
मुद्दा दायर गरेपछि उनका पूर्वपतिले डेढलाख डलर तिर्न मञ्जुरी जनाएका छन् ।