अन्तर्राष्ट्रिय अपराध अदालतका कर्मचारीमाथि अमेरिकी भिसा प्रतिबन्ध
प्रकाशित मिति : चैत्र १, २०७५ शुक्रबार
अमेरिकी विदेशमन्त्री माइक पम्पिओले अन्तर्राष्ट्रिय अपराध अदालतका कर्मचारीलाई भिसा नदिने घोषणा गरेका छन् । अमेरिकी सेनाले अफगानिस्तानमा युद्धअपराध र मानवताबिरुद्धको अपराध गरेको हुनसक्ने भन्दै अन्तर्राष्ट्रिय अपराध अदालतका तर्फबाट सम्भावित अनुसन्धान हुनसक्ने चर्चा भइरहदा अमेरिकाले यस्तो कदम चालेको हो ।
पम्पिओले शुक्रबार विदेशमन्त्रालयमा बोल्दै अन्तर्राष्ट्रिय अपराध अदालतका व्यक्तिहरु जसले त्यस्तो खालको कदम लिएका छन् वा त्यस्तो अनुसन्धानको आग्रह गरेका छन् उनीहरुलाई भिसा प्रतिबन्ध लगाइने बताएका हुन् । उनले भिसा प्रतिबन्धको नीति लागु भइसकेको बताएपनि कसकसले यस्तो पतिबन्ध सामना गर्ने भन्नेबारे केही बताएनन् ।
अन्तर्राष्ट्रिय अपराध अदालतले आफ्ना गतिविधि परिवर्तन नगरे आर्थिक नाकाबन्दी लगाउने समेत पम्पिओले चेतावनी दिएका छन् । तर अन्तर्राष्ट्रिय अपराध अदालतले भने आफूहरु गैरराजनीतिक स्वतन्त्र निकाय भएको र स्वतन्त्ररुपमा अनुसन्धान जारी राख्ने बताएको छ ।
सन् २०१७ को नोभेम्बरमा अन्तर्राष्ट्रिय अपराध अदालतका अभियोजनकर्ता फाटोउ बेन्साउडाले अफगानिस्तानमा भएको सम्भावित युद्ध अपराधका सन्दर्भमा अनुसन्धान खोल्ने अनुमतिको निगरानी गरेका थिए ।