ट्रम्पको संकटकालबिरुद्धको प्रस्ताव प्रतिनिधिसभाबाट बहुमतले पारित, अब सिनेटमा लगिने
प्रकाशित मिति : फाल्गुन १४, २०७५ मंगलबार
अमेरिकी राष्ट्रपति डोनाल्ड ट्रम्पले घोषणा गरेको राष्ट्रिय संकटकालबिरुद्ध अमेरिकी प्रतिनिधिसभा हाउस अफ रिप्रिजेन्टेटिभबाट प्रस्ताव पारित भएको छ । प्रस्तावको पक्षमा २४५ र विपक्षमा १८२ मत परेको छ ।
अमेरिकी राष्ट्रपति डोनाल्ड ट्रम्प उत्तर कोरियाली नेतासँग वार्ताका लागि भियतनाम भ्रमणमा रहेका बेला अमेरिकी संसदको तल्लो सदनबाट संकटकाल खारेज गर्ने प्रस्ताव पारित भएको हो । प्रस्तावको पक्षमा १३ रिपब्लिकन सांसदहरुले पनि मतदान गरेका छन् ।
अमेरिकी राष्ट्रपतिको भिटो पावरलाई ओभरराइड गर्नका लागि संसदबाट दुईतिहाई बहुमतले प्रस्ताव पारित हुन जरुरी छ । त्यसका लागि भने पस्तावको पक्षमा दुईदिहाई मत खस्न सकेको छैन । दुईतिहाईका लागि २९० मतको आवश्यकता छ ।
हाउसबाट पारित प्रस्ताव अब सिनेटमा पेश गरिनेछ । सिनेटमा १८ दिनभित्र उक्त प्रस्ताव मतदानका लागि ल्याउनुपर्ने प्रावधान छ । उक्त प्रस्ताव सिनेटबाट पारित भएमा राष्ट्रपति समक्ष हस्ताक्षरका लागि लगिनेछ । राष्ट्रपतिले भिटो पावर मार्फत उक्त प्रस्ताव अस्वीकार गर्ने लगभग निश्चित भएपनि अमेरिकी राजनीतिमा यो भयानक लज्जा हुनेछ ।