उत्तर कोरियाली नेता किम पुगे भियतनाम, रेड कार्पेटमा स्वागत
प्रकाशित मिति : फाल्गुन १४, २०७५ मंगलबार
झण्डै ४ हजार किलोमिटरको रेलयात्रा पूरा गरेर उत्तर कोरियाली नेता किम किम जोङ उन भियतनाम पुगेका छन् । उनलाई त्यहाँ रेड कार्पेटमा स्वागत गरिएको छ । यसैसाता अमेरिकी राष्ट्रपति डोनाल्ड ट्रम्पसँग हुने वार्ताका लागि उनी भियतनाम हुन् ।
गतबर्ष ट्रम्प र किमबीच सिंगापुरमा भएको वार्तापछिको यो दोश्रो शिखरवार्ता हुनेछ । किमको पहेंलो र हरियो ट्रेन दोङदाङमा रोकेपछि उनले हनोइको यात्रा कारमार्फत सुरु गरेका थिए । झण्डा फहराउँदै किमलाई ट्रेनबाहिर रेडकार्पेटमा स्वागत गरिएको थियो । स्वागतमा तैनाथ भींडतिर केहीबेर रोकिएपछि किम कारमा चढेका थिए ।
प्योङयाङदेखि भियतनामसम्मका लागि किमले झण्डै २ दिन लगाएर ४ हजार किलोमिटरको यात्रा गरेका थिए । किमको ट्रेन चीनहुँदै अगाडि बढेको थियो । जहाँ किमको यात्रालाई सहज बनाउन सर्वसाधारणका लागि बाटाहरु र ट्रेन स्टेशनहरु बन्द गरिएका थिए । भियतनामको दोङदाङ स्टेशन पनि सर्वसाधारणका लागि बन्द गरिएको थियो । उक्त स्टेशनबाट किम झण्डै १७० किलोमिटरको यात्रा गरेर हनोइ पुगेका छन् ।