अष्ट्रेलियाको भिसा बिना नै अष्ट्रेलियामा १८ वर्ष बसे एक भारतीय
प्रकाशित मिति : फाल्गुन ७, २०७५ मंगलबार
अष्ट्रेलियाको भिसा बिना नै एक भारतीय अष्ट्रेलियामा १८ वर्ष बसेका छन् ।
भारतका ५९ वर्षीय अवतार सिंह सन् २००० नोभेम्बरमा अष्ट्रेलिया आएका थिए । उनी भिजिट भिसामा अष्ट्रेलिया आएका हुन् । त्यसपछि उनको भिसाको म्याद अर्को वर्ष अर्थात २००१ मा सकियो । तर पनि उनले अष्ट्रेलिया छोडेनन् ।
सिंहले पहिलो भिसाको म्याद सकिएपछि भिसाको लागि निवेदन दिए, तर भिसा अस्विकार भयो । भिसा अस्विकार भएतापनि पनि उनले बारम्बार एप्लाई गरिरहे । सिंहले सबै भन्दा पछिल्लो पटक डिसेम्बर २०१७ मा एप्लाई गरेका थिए । उनले उपचार भिसा एप्लाई गरेका थिए र उपचार गर्नुपर्ने बिमारमा एन्जाईटि तथा हाइपरटेन्सन उल्लेख गरेका थिए । तर भिसाको उद्देश्यमा आशंका गर्दै उनको भिसा फेरी रिजेक्ट भयो ।
सिंहले भिसा रिजेक्टको विरुद्धमा अपिल गरे । तर २१ दिनको म्याद सकिएपछि अपिल गरिएकोले उनको अपिल खारेज भयो । त्यसपछि उनले त्यसको विरुद्धमा फेरी अदालतमा मुद्दा दायर गरे । अदालतमा पनि म्याद गुज्रिए पछि अपिल गर्नु सिंहकै गल्ती भएको भन्दै मुद्दा खारेज गरिदियो । यो संगै अदालतले मुद्दाका कारण गृह विभागको अनावश्यक खर्च भएको भन्दै सिंहलाई ३ हजार ६ सय ६७ डलर क्षतिपुर्ति भर्ने आदेश समेत दियो ।
अष्ट्रेलियामा यसरी बस्नेहरु काम गर्दा क्यास लिएर काम गर्छन् र काममा पनि अनेक अप्ठ्यारो व्यहोर्ने गर्छन् । उनीहरु सुरक्षित रहँदैनन् । र लुकेर बसिरहेका हुन्छन् ।