खर्च विधयेक हाउसबाट भारीमतले पारित, अब ट्रम्पले हस्ताक्षर गर्ने, संकटकाल भोलि
प्रकाशित मिति : फाल्गुन ३, २०७५ शुक्रबार
अमेरिकी सरकार शटडाउन हुन नदिनेगरी सिनेटबाट पारित सरकारी खर्च विधयेक प्रतिनिधिसभाले पनि पारित गरेको छ । प्रतिनिधिसभामा विधयेकका पक्षमा ३ सय र विपक्षमा १ सय २८ मत खसेको छ । अब विधयेकमा राष्ट्रपति डोनाल्ड ट्रम्पले हस्ताक्षर गर्नेछन् ।
डेमोक्र्याट्सको बहुमत रहेको प्रतिनिधिसभाबाट पारित हुनुअगाडि सिनेटबाट पनि विधयेक भारीमतले पारित भएको थियो । सिनेटमा खर्च विधयेकका पक्षमा ८३ मत खसेको थियो भने विपक्षमा १६ मत खसेको थियो ।
अमेरिकी राष्ट्रपति डोनाल्ड ट्रम्पले खर्च विधयेकमा हस्ताक्षर लगत्तै मुलुकमा राष्ट्रिय संकटकालको घोषणा समेत गर्ने तयारी गरेका छन् । तर त्यस्तो संकटकालको घोषणा भोलिमात्र एक कार्यकारी आदेशमार्फत गर्ने जनाइएको छ ।
सिनेटमा बहुमतप्राप्त दलका नेता मिच म्याक्वेनेलले राष्ट्रपति ट्रम्पबाट सिमानामा पर्खाल निर्माणका लागि संकटकाल लगाउने तयारी भइरहेको खुलासा गरेका हुन् । डेमोक्रेटिक नेताहरुले भने ट्रम्पले लगाउन लागेको सम्भावित संकटकाललाई कानुनविहिन गतिविधिको संज्ञा दिएका छन् । सिनेटमा अल्पमत पक्षमा डेमोक्र्याट्स नेता चक शुमर र प्रतिनिधिसभा सभामुख न्यान्सी पेलोसीले वक्तब्य जारी गर्दै संकटकालको घोषणा गरिएमा त्यो शक्तिको दुरुपयोग हुने बताएका छन् ।
विधयेकमा सिमानामा पर्खाल निर्माणका लागि ५ दशमलव ७ बिलियन डलर नछुट्याइएकाले राष्ट्रपति ट्रम्प बेखुशी रहेका छन् । ट्रम्पले कार्यकारी आदेशमार्फत सिमानामा पर्खाल निर्माणका लागि ८ बिलियन डलरको घोषणा गर्ने जनाइएको छ । तर त्यो रकमको श्रोतभने कहाँबाट प्राप्त हुने भन्नेबारे खुलाईएको छैन ।
ट्रम्पले संकटकालको घोषणा गरेपछि पर्खाल निर्माणका लागि अन्य मन्त्रालयका लागि छुट्याइएको बजेट समेत प्रयोग गर्न सक्नेछन् । ट्रम्पले आफ्नो चुनावी एजेण्डामा पर्खाल निर्माणको विषयलाई प्रमुखताका साथ उठाएका थिए ।