शुक्रबारदेखि पुन अमेरिकी सरकार शटडाउनको खतरा
प्रकाशित मिति : माघ २८, २०७५ सोमबार
अहिलेसम्म कुनै सहमति कायम हुन नसक्दा शुक्रबाररातीदेखि पुन अमेरिकी सरकार शटडाउन हुने खतरा देखिएको छ । अमेरिकी सरकार शटडाउन भएमा पुन लाखौं संघीय कर्मचारीहरु वेतलवी हुनेछन्, सरकारका कैयन निकायहरुका कामकाज ठप्प हुनेछन्, अदालतहरुमा अदालती सुनुवाईहरु स्थगित हुनेछन्, ट्याक्स सिजनमा आईआरएस प्रभावित हुनेछ ।
सोमबार सांसदहरुले सहमतिको प्रयास गर्ने जनाइएपनि अहिलेसम्म सहमतिको कुनै संकेत देखिएको छैन । यद्यपी सोमबारसाँझसम्म सिनेट र प्रतिनिधिसभाका मुख्य चारसदस्यहरुबीच सहमति कायमको प्रयास हुने जनाइएको छ ।
सिमानामा पर्खाल लगाउने विषयमा सहमति कायम हुननसक्दा यसअगाडि ३५ दिनसम्म अमेरिकी सरकार शटडाउन भएको थियो । जुन अमेरिकी इतिहासमा अहिलेसम्मकै सबैभन्दा लामो इतिहास रहेको थियो । अहिलेपनि सिमानामा पर्खालको विवाद कायम नै छ ।
अमेरिकी राष्ट्रपति डोनाल्ड ट्रम्पले सिमानामा पर्खाल निर्माणका लागि ५ दशमलव ७ बिलियन डलरको माग गरिरहेका छन् । तर डेमोक्र्याट्सहरु पर्खाल बनाउने विषयमा सहमत छैनन् ।