प्रधानमन्त्रीमा चुनाव लड्ने थाई राजकुमारीको घोषणा, राजाले गरे निन्दा
प्रकाशित मिति : माघ २५, २०७५ शुक्रबार
थाईल्याण्डमा राजकुमारी उबोलरत्ना माहिडोलले प्रधानमन्त्रीको चुनाव लड्ने घोषणा गरेकोमा त्यहाँका राजाले राजकुमारीको कदमको निन्दा गरेका छन् । राजाले एक बक्तब्य निकाल्दै राजकुमारीको कदमले राष्ट्रको संस्कृतिको अपमान गर्ने बताएका छन् ।
थाई राजाकी ६७ वर्षिया दिदीले पूर्वप्रधानमन्त्री थाकसिन सिनावत नजिक रहेको दलबाट चुनाव लड्ने भएकी हुन् । राजकुमारीको यो निर्णयले थाई राजपरिवारको राजनीतिबाट टाढै रहने परम्परालाई तोडेको छ ।
राजाको यस्तो हस्तक्षेपकका कारण राजकुमारी चुनाव लड्नबाट अयोग्य हुनसक्ने विश्लेषण गरिएको छ । राजकुमारीले भने आफूले सबै शाही पदवीहरु त्यागेको र सर्वसाधारणका रुपमा जीवन यापन गरिरहेको बताएकी छिन् । तर राजाले उनले शाही पदवीहरु त्यागेपनि उनी चक्री बंशको सदस्य भएकाले चुनाव लड्न नहुने बताएका छन् ।
थाईल्याण्डमा मार्च २४ गते प्रधानमन्त्रीका लागि निर्वाचन हुँदैछ । पाँच वर्षको सेनाको शासनपछि हुन लागेको यो निर्वाचनले थाईल्याण्डलाई प्रजातन्त्रमा फर्काउन सक्नेछ ।
राजकुमारी उबोलरत्ना राजकन्या श्रीबन्दना बर्नाभदी सन् १९५१ मा स्वर्गीय राजा पुमिपोन अदुन्यदेतको पहिलो सन्तानको रूपमा जन्मिएकी थिइन् । उनले मासाट्युट्स इन्सटिट्युट अफ टेक्नोलोजीमा पढेकी थिइन् र सन् १९७२ मा अमेरिकी नागरिकसँग विवाह गर्न राजपरिवार त्यागेकी थिइन् ।
परापाचुके गरेपछि उनी सन् २००१ मा थाईल्याण्ड फर्किएर राजपरिवारका कार्यक्रममा देखिन थालेकी थिइन् । उनी सामाजिक सञ्जालमा अभ्यस्त छिन् र केही थाई सिनेमाहरूमा पनि देखिएकी थिइन् ।
उनको तीन सन्तान थिए, जसमध्ये एकजना सन् २००४ को सुनामीमा मारिएका थिए। राजकुमारी थाई रक्षा चार्ट पार्टीको तर्फबाट उम्मेदवार बनेकी हुन् ।
वर्तमान प्रधानमन्त्री प्रयुथ चानऔचाले पनि निर्वाचनमा उम्मेदवार हुने घोषणा गरेका छन् । सन् २०१४ को कूबाट शक्तिमा आएका उनी पालुङ प्रचारत पार्टीको उम्मेदवार हुनेछन् ।
यो निर्वाचनलाई सिनावत परिवार र सैनिक शक्तिबीचको टकरावको रूपमा हेरिएको छ । प्रयुथ शक्तिमा आउँदा थाकसिन सिनावतकी बहिनी यिङ्लक सिनावत प्रधानमन्त्री थिइन्।
सिनावत र उनकी बहिनी अहिले स्वघोषित निर्वासनमा छन् ।