पत्रिकाले ब्लाकमेल गरेको विश्वकै सबैभन्दा धनी बेजोसको आरोप
प्रकाशित मिति : माघ २५, २०७५ शुक्रबार
विश्वकै सबैभन्दा धनी व्यापारी अमेजन डट कमका संस्थापक जेफ बेजोसले नेशनल इन्क्वाएरर पत्रिकाको मालिकले आफ्नो गोप्य तस्बिरहरू छाप्ने धम्की दिँदै आफूलाई ब्ल्याकमेल गरेको आरोप लगाएका छन्।
बेजोसका अनुसार त्यो म्यागाजिनको संस्थापक कम्पनीले त्यो पत्रिकाले उनको गोप्य तस्बिरहरू कसरी फेला पार्यो भन्ने विषयमा अनुसन्धान रोक्न उनलाई दबाब दिएको छ। बेजोस र उनकी श्रीमती म्याकेन्जीले गत महिना आफूहरूले सम्बन्ध विच्छेद गर्न लागेको बताएका थिए। त्यसलगत्तै नेशनल इन्क्वाएररले ती प्रविधि कम्पनीका मालिकको विवाहभन्दा बाहिरका सम्बन्धबारे लेखहरू प्रकाशित गर्यो।
बेजोसले बिहीवार एक ब्लग प्रकाशित गर्दै एएमआईका वकीलहरूले पठाएका भनिएका इमेलहरू अनलाइन राखिदिएका छन्। ती इमेलमा बेजोसले सम्बन्ध राखिरहेको भनिएकी एक महिला र उनको अन्तरङ्ग तस्बिरहरू छापिदिने चेतावनी दिइएको उल्लेख गरिएको छ।
बेजोस् विश्कै सबैभन्दा धनी व्यक्ति हुन्। आफूहरूबीच आदानप्रदान भएका गोप्य फोटो न्याशनल इन्क्वाएररले कसरी पायो भन्नेबारेको अनुसन्धान नरोकेमा ती तस्बिरहरू सार्वजनिक गरिदिने धम्की एएमआईले दिएको बेजोसले बताएका छन्।