क्रिप्टोकरेन्सी संस्थापकको मृत्युले १४५ मिलियन डलर गायब, एकलाख बढीलाई रिफण्डको समस्या
प्रकाशित मिति : माघ २२, २०७५ मंगलबार
क्यानडाको सबैभन्दा ठूलो क्रिप्टोकरेन्सीका संस्थापक जेराल्ड कटनको अचानक मृत्यु भएपछि १४५ मिलियन डलर बराबरको डिजिटल मुद्रा हराउने खतरा भएको छ।
क्वाडरिगा नामक भर्चुअल मुद्रा लेनदेन गर्ने सदस्यहरूको लगानी सुरक्षित गर्न अदालतमा मुद्दा दायर भएको छ।तीन बर्र्षीय कटनको गत डिसेम्बरमा मृत्युभए यता ती क्रिप्टोकरेन्सी मुद्रा कहाँ छन् भन्ने पत्ता लगाउन सकिएको छैन। उनी एक्लैले क्वाडरिगाको कोष र मुद्राको व्यवस्थापन जिम्मेवारी लिएका थिए।
जनवरी ३१ मा क्यानडाको नोभा स्कटिया सर्वोच्च अदालतमा पेश गरिएको कागजातमा कोटेनकी विधवा जेनिफर रोबर्टसनले आफ्नो पतिले क्वाडरिगासम्बन्धी कार्य गर्ने कम्प्युटर इन्क्रिप्ट गरिएको र आफुलाई त्यसको पासवर्ड थाहा नभएको बताएकी छिन्। पटक पटकको प्रयासपछि पनि उनले कतै पनि उनले केही लेखेको कुरा पत्ता लगाउन सकेकी छैनन् ।
क्वाडरिगा कम्पनीले एक जना अनुसन्धानकर्मीलाई सूचना खोज्न लगाएपनि उनले कटनको फोन र कम्प्युटरको सहारामा थोरै मुद्रामात्रै खोज्न सकेको बताइएको छ।
कम्पनीका अनुसार एक लाख १५ हजार मानिसहरूको क्वाडरिगामा एकाउन्ट रहेको छ।
अब उनीहरुले कसरी रिफण्ड पाउने भन्ने सन्दर्भमा समस्या भएको छ । अदालतमा पेश गरिएको कागजातका अनुसार क्वाडरिगाले ह्याकरबाट जोगाउन धेरै जसो मुद्रा कोल्ड वालेटमा राखेका थिए ।
क्रिप्टोकरेन्सी भनेको डिजिटल वा भर्चुअल अर्थात कुनै भौतिक अस्तित्व नभएका मुद्रा हो। क्रिप्टोकरेन्सीको केन्द्रीय ब्याङ्क हुँदैन र संसारभरका थुप्रै कम्प्युटरहरूमा राखिएको रेकर्डको आधारमा यो सञ्चालन हुन्छ। यसबाट सरसमान किन्न वा भुक्तानी गर्न सकिन्छ।
संसारभर क्रिप्टोकरेन्सीको प्रचलन र भाउ बढ्दै गएका कारण मानिसहरूले सुन या भौतिक मुद्रा बेचेर यसमा लगानी गर्ने चलन बढेको छ।