आइतबार जापानको ठूलो क्षेत्रमा भारी हिमपात हुनसक्ने, सुरक्षित रहन आग्रह
प्रकाशित मिति : माघ १२, २०७५ शनिबार
निरन्तर चिसो बहाबका कारण जापानका धेरै क्षेत्रहरुमा आइतबार भारी हिउँ पर्ने यहाँका मौषम अधिकारीहरुले जनाएका छन् । हिउँका कारण हुनसक्ने जोखिमका लागि सतर्क रहन उनीहरुले आग्रह समेत गरेका छन् ।
जापान मेटोरोलोजिकल एजेन्सीका अनुसार शनिवार निगाता प्रिफेक्चरको जोएचु सहरमा १ दशमलब ३५ मिटर हिउँ जमेको थियो भने नागानो प्रिफेक्चरको एक गाउँमा १ दशमलव १५ मिटरसम्म हिमपात भएको थियो ।
मौषम अधिकारीहरुका अनुसार आगामी २४ घण्टाभित्र निगातामा थप १ मिटर र नागानोमा थप ८० सेन्टिमिटर हिमपात हुने अनुमान छ ।
पश्चिमी जापानका विभिन्न क्षेत्रहरुमा २० सेन्टिमिटर देखि ७० सेन्टिमिटर सम्म बाक्लो हिउँ पर्नसक्ने अनुमान छ । मौषम अधिकारीहरुले हिउँसंग सम्बन्धित दुर्घटनाहरुबाट जोजिन पनि सुझाव दिएका छन् ।
शुक्रबारदेखिनै चलेको चिसो हावाका कारण जापानका धेरै स्थानहरुमा चिसो निकै बढेको छ । शनिबार र आइतबार पश्चिमी र पूर्वी जापानका धेरै स्थानहरुमा भारी हिमपात हुनसक्ने अनुमान मेटोरोलोजिकल एजेन्सीको छ ।
हिउँ हटाउने क्रममा एकको मृत्यु
हिउँ हटाउने क्रममा घरको छानाबाट लडेर निगाता केनमा बस्ने ७६ बर्षिय जापानी नागरिकको मृत्यु भएको छ । शनिबार करिब पौने ४ बजेको समयमा घरको छानामा रहेको हिउँ हटाउने क्रममा लडेर बेहोस भएका उनको हस्पिटल लैजाँदैगर्दा मृत्यु भएको हो ।