आदिवासी अमेरिकन बृद्धको अपमान गरेको आरोप टिनएजरबाट अस्वीकार
प्रकाशित मिति : माघ ७, २०७५ सोमबार
एकजना आदिवासी अमेरिकन र विद्यार्थीहरुको समुहबीचको जम्काभेटको विवादास्पद भिडियो सार्वजनिक भएपछि उक्त घटनामा संलग्न अमेरिकन टिनएजरले घटनाबारे मुख खोलेका छन् । ती टिनएजरले आफ्नो उद्देश्य ती बृद्धको अपमान गर्नु नरहेको बताएका छन् ।
वासिंटनमा अमेरिकन आदिवासी नाथन फिलिप्सले ढ्यांग्रो बजाउँदै गीत गाउँदा अगाडि उभिएर उनको आँखामा एकटकले हेरिरहेका टिनएजर निक स्याण्डम्यानको भिडियो भाइरल भएको थियो । त्यसपछि टिनएजर निकले आदिवासी अमेरिकन बृद्धको अपमान गरेको भन्दै ब्यापक आलोचना भएको थियो ।
आफूले कुनै हाउभाउ वा आक्रमक गतिविधि नगरेको बरु शान्त र अचल बसेर स्थीतिलाई नियन्त्रणबाहिर जानबाट रोक्न मद्दत गरेको टिनएजर निकले बताएका छन् । भिडियोमा मेक अमेरिका ग्रेट अगेन लेखेको टोपी लगाएका ती विद्यार्थीले ढ्यांग्रो बजाउँदै मन्त्र जपेका बृद्धालाई एकटकले हेरिरहेको देख्न सकिन्छ ।
View this post on Instagram
शुक्रबार केन्टकीको कोभिंटन क्याथोलिक हाइस्कुलका विद्यार्थीहरु गर्भपतनबिरुद्धको एउटा प्रदर्शनपछि लिंकन मेमोरियलमा जम्मा भएका थिए । उनीहरु अधिकांश गोरा अमेरिकनहरु थिए भने मेक अमेरिका ग्रेट अगेनको टोपी लगाएका थिए ।
भियतनाम युद्धका भेट्रान समेत रहेका आदिवासी अमेरिकन फिलिप र अरु आदिवासी अमेरिकन अधिकारकर्मीहरु पनि मेमोरियलमा जम्मा भएका थिए । उनीहरुले आदिवासीहरुको प्रदर्शनमा भाग लिइरहेका थिए । त्यती नै बेला आफूलाई हिबु्र इजरायली बताउने अश्वेतहरुको एउटा समुह आएर आदिवासीहरु र विद्यार्थीहरुको अपमान हुनेगरी हुलदंगा गरेका थिए ।
त्यसपछि विद्यार्थीहरुको समुहले प्राथना र नाराबाजी सुरु गरेको थियो भने एकजनाले आफ्नो शरिरको माथिपट्टी लगाएको कपडा समेत खोलेका थिए । त्यसपछि आदिवासी बृद्ध फिलिप विद्यार्थीहरु भएको स्थानमा पुगेर ढ्यांग्रो बजाउँदै प्राथना सुरु गरेका थिए । स्थीतिलाई नियन्त्रणमा लिन उनले त्यसो गरेको बताएका छन् ।
फिलिप विद्यार्थीहरुबाट घेरिएका थिए भने केही विद्यार्थीहरुले नाराबाजी, मन्त्रोच्चारण र प्राथना समेत सुरु गरेका थिए । त्यसैबेला विद्यार्थी स्याण्डम्यान फिलिपको सिधा अगाडि उभिएर मुस्कुराएको र अरु विद्यार्थीहरुले तालिबजाउँदै चिच्याएको र हाँसेको भिडियो सार्वजनिक भएको थियो । उक्त भिडियो सार्वजनिक भएपछि विद्यार्थीहरुले बृद्धलाई जिस्काएको र अपमान गरेको भन्दै आलोचना भएको थियो ।
कोभिंटन क्याथोलिक हाइस्कुलले समेत बृद्धसमक्ष माफी माग्दै घटनाबारे अनुसन्धान गर्ने जनाएको छ । यसैबीच सिस्टर अफ मर्सी नामको क्याथोलिक समुहले पनि आदिवासीहरुप्रति विद्यार्थीहरुले अपमान गरेको भन्दै आलोचना गरेको छ ।
यद्यपी विद्यार्थीहरुका समर्थकहरुले भने हिब्रु इजरायली बताउने अश्वेत समुहले विद्यार्थीहरुलाई गालीगलौज गर्दै हुलदंगा मच्याएको र फिलिप आफै ढ्यांग्रो बजाउँदै विद्यार्थीहरु भएको स्थानमा पुगेको बताएका छन् । फिलिपका अगाडि मुस्कुराएर उभिएका विद्यार्थी स्याण्डम्यानले आफूबिरुद्धको झुठ फैलिएको र घटनाका कारण आफूलाई ज्यानमार्ने धम्की आएको गुनासो गरेका छन् ।
निक स्याण्डम्यानका अनुशार अश्वेत प्रदर्शनकारीहरुले विद्यार्थीहरुलाई व्यभिचारी र जादिवादी भन्दै गाली गरेका थिए । सार्वजनिक रुपमा गालीगलौज भएपछि विद्यार्थीहरुले शिक्षकको अनुमतिमा घृणाजनक गालीबिरुद्ध धार्मिक मन्त्रोच्चारण गर्न सुरु गरेका थिए ।
त्यती नै बेला फिलिप प्राथना गर्दै र ढ्यांग्रो बजाउँदै आफूतिर आएको तथा आफ्नो अनुहारमा एकटकले हेरेको विद्यार्थीले बताएका छन् । विद्यार्थीले भनेका छन् मैले आदिवासी अमेरिकनको प्रदर्शनमा अवरोध सृजना गरेको थिइन । मैले कुनै गलत आशयले पनि उनको अनुहारमा हेरेको थिएन । मैले आफू नरिसाएको उनले थाहा पाउन् भनेर बीचमा मुस्कुराएको समेत थिएँ ।
सम्पूर्ण घटनाको दौरानमा विद्यार्थीहरुले केबल स्कुलको प्राथना गरेको र कुनै घृणाजनक कुराहरु नबोलेको जनाइएको छ । तर फिलिपले भने विद्यार्थीहरुले पर्खाल लगाउनुपर्छ भन्दै चिच्याएको बताएका छन् । भिडियोमा त्यस्तो कतै नसुनिएपनि घटना प्रत्यक्षदर्शी संचारकर्मीहरुले पनि पर्खाल बनाउ र ट्रम्प २०२० जस्ता नाराहरु आफूले सुनेको बताएका छन् ।
आदिवासी फिलिपले प्राथनाका लागि आफू लिंकन स्ट्याचु जाने क्रममा एकजना विद्यार्थीले रोकेको आरोप लगाएका छन् । आफ्नो राज्यमा यस्ता आदिवासीहरु जड्याहाहरुबाहेक कोही नभएको भन्दै विद्यार्थीहरुले कुरा गरेको आफूले सुनेको फिलिपले दावी गरेका छन् ।
यसैबीच हिब्रु इजरायली अश्वेत समुहका तर्फबाट एउटा भिडियो सार्वजनिक गर्दै घटनाको सुरुवात विद्यार्थीहरुले गरेको आरोप लगाइएको छ ।