वृद्धाले बान्ता गर्न गुडिरहेको बसको झ्यालबाट टाउको निकालिन्, खम्बामा ठोक्किँदा टाउको छुट्टियो
प्रकाशित मिति : माघ ५, २०७५ शनिबार
यात्राको क्रममा मानिसहरुले थुप्रै पटक यस्ता स–साना गल्ती गर्छन् जसले ठूलो दुर्घटना निम्त्याउँछ । यस्तै एक मामला भारतको मध्य प्रदेशस्थित पन्ना जिल्लामा भएको छ । यहाँकी एक वृद्धाले बस यात्राको क्रममा झ्यालबाट टाउको बाहिर निकाल्नु निकै भयानक साबित भयो ।
ती वृद्धाले सँगै बसेकी महिलासँग दुर्घटना हुनु एकैछिन अघिमात्र सिट परिवर्तन गरेकी थिइन् । उनले बान्ता गर्न गुडिरहेको बसको झ्यालबाट टाउको निकाल्ने बित्तिकै उनको टाउको काटिएर बाहिर खस्यो । घटना शुक्रबारको हो ।
भारतको कोतवाली पुलिस थानाका इन्स्पेक्टर अरविन्द कुजुरको भनाई उद्धृत गर्दै पीटीआईले दिएको जानकारी अनुसार छतरपुरबाट पन्ना हुँदै सतना जाँदै गरेको सार्वजनिक बसमा छतरपुर जिल्लाकी ५० वर्षीया आशारानी खरे सतना जाँदै थिइन् । पन्नाको साइन्स कलेज अगाडि भएको बिजुलीको खम्बामा ठोक्किएका कारण आशारानीको टाउको काटियो । उनको टाउको सडकमा बजारियो भने शरिर बसको सीटमा रह्यो ।
उनीसँगै बसेकी एक महिलाले घटनाबारे जानकारी दिएकी छिन् । भारतीय संचारमाध्यमसँगको कुराकानीमा उनले भनिन्, ‘मृतक महिला बीचमा बसेकी थिइन् । आफूलाई बान्ता हुने भन्दै उनले मलाई झ्यालमा बस्न दिन आग्रह गरिन् । मैले उनलाई आफू बसेकोे ठाउँ छोडिदिएँ । उनले बान्ता गर्न टाउको बाहिर निकाल्ने बित्तिकै दुर्घटना भयो । बस, खम्बाको यति नजिकबाट यात्रा गर्यो कि यी दुईबीच केही इन्चको मात्र दुरी थियो । यसैबीच दुर्घटना भयो ।’