बलात्कारको सूचना दिने पत्रकार हत्या मामलामा राम रहिमलाई जन्मकैद, समर्थकलाई शान्त रहन अपिल
प्रकाशित मिति : माघ ४, २०७५ शुक्रबार
बीबीसी
डेरा सच्चा सौदाका प्रमुख गुरमित राम रहिमलाई पंचकुलाको विशेष सिबिआई अदालतले पत्रकार रामचन्द्र छत्रपति हत्या मामलामा जन्मकैदको सजाय सुनाएको छ ।
पत्रकार रामचन्द्र छत्रपतिको हत्या सन् २००२ मा भएको थियो । अदालतले गुरमित राम रहिमलाई ११ जनवरीमा यो मामलामा दोषी ठहराएको थियो ।
डेरा प्रमुखसहित तीन अन्य व्यक्ति कुलदीप सिंह, निर्मल सिंह र कृष्ण लाललाई पनि दोषी ठहराइएको थियो । उनीहरुलाई पनि जन्मकैदको सजाय सुनाइएको छ ।
डेरा सच्चा सौदाका वरिष्ठ उपाध्यक्ष शोभा इन्साले समर्थकलाई शान्त रहन अपिल गरेकी छिन् ।
उनले ट्वीट गरेर यो मामलामा थप कानूनी प्रक्रिया चलाइने जानकारी दिएकी छिन् ।
जुन अदालतले राम रहिमलाई पत्रकारको हत्याको मामलामा सजाय सुनायो त्यही अदालतले सन् २०१७ को अगस्टमा उनलाई बलात्कारका दोषी ठहराएको थियो । पत्रकार रामचन्द्र छत्रपतिले नै सन् २००२ मा बलात्कारको पहिलो पटक जानकारी दिएका थिए ।
बलात्कारको सजाय सुनाएका न्यायाधिस जगदीप सिंहले नै राम रहिमलाई यो मामलामा पनि सजाय सुनाएका थिए ।
पत्रकार रामचन्द्र छत्रपति सन् २००२ मा गोली लागेका कारण गम्भीर रुपमा घाइते भएका थिए र पछि उनको उपचारको क्रममा मृत्यु भएको थियो । सन् २००३ मा यससम्बन्धि मुद्दा पनि दर्ता गरिएको थियो जुन सन् २००६ मा सिबिआईलाई सुम्पिएको थियो ।
बलात्कार मामलामा पहिले नै सजाय काटिरहेका छन्ः
राम रहिम सन् २०१७ अगस्टमा महिला अनुयायीलाई बलात्कार गरेको आरोपमा सजाय सुनाइएको थियो तब हरियाणको सिरसा र पंचकुलामा हिंसा भड्किएको थियो ।
यो हिंसामा लगभग ४० जनाको मृत्यु भएको थियो । त्यसकारण आज पनि हरियाणा र पंजाबका विभिन्न क्षेत्रमा सुरक्षाको कडा व्यवस्था गरिएको थियो ।
५१ वर्षका राम रहिम अहिले बलात्कारको मामलामा रोहतकको सुनारिया जेलमा २० वर्षको जेल सजाय काटिरहेका छन् ।