ट्रम्पको स्टेट अफ द युनियन सम्बोधन सार्न सुझाव
प्रकाशित मिति : माघ २, २०७५ बुधबार
आगामी जनवरी २९ मा अमेरिकी राष्ट्रपति डोनाल्ड ट्रम्पले बार्षिक रुपमा गर्ने विशेष सम्बोधन सार्न प्रतिनिधिसभाकी सभामुख न्यान्सी पेलोसीले सुझाव दिएकी छिन् । सरकार शटडाउन जारी रहेको बेलामा स्टेट अफ द युनियन सम्बोधन नगर्न उनले सुझाव दिएकी हुन् ।
सरकार शटडाउन अन्त्य भएपछि कुनै उपयुक्त मितिमा स्टेट अफ द युनियन सम्बोधन गर्दा उचित हुने उनको सुझाव छ । सरकार शटडाउनका कारण सुरक्षा प्रदान गर्ने निकायका कर्मचारीहरु पनि प्रभावित भएकाले सम्बोधन अहिले गर्न उचित नभएको उनको तर्क छ ।
स्टेट अफ द युनियन अमेरिकी राष्ट्रपतिको विशेष बार्षिक सम्बोधन हो । अमेरिकी सरकारका सबै तीनवटा शाखाका सबै नेतृत्वहरु जम्मा भएर राष्ट्रपतिले गर्ने यो विशेष सम्बोधनका लागि कैयन दिनदेखि तयारी गरिन्छ ।
शटडाउनबाट प्रभावित अन्य एजेन्सीका साथमा सेक्रेट सर्भिसले यो सम्बोधनका लागि सुरक्षा प्रदान गर्छ । तर सेक्रेट सर्भिस लगायत होमल्याण्ड सेक्युरिटीका सुरक्षा प्रदान गर्ने अधिकारीहरुले विगत २६ दिनदेखि विना तलब काम गरिरहेका छन् ।
पेलोसीले ह्वाइटहाउसलाई लेखेको पत्रबारे ह्वाइटहाउसले भने कुनै प्रतिकृया जनाएको छैन । पेलोसीले सरकार शटडाउनका बेला गरिने स्टेट अफ द युनियन सम्बोधनको कुनै अर्थ नहुने बताएकी छिन् ।