अस्पतालको यति हदसम्मको लापरबाही : गर्भवती महिलालाई दियो एचआइभी संक्रमित रगत
प्रकाशित मिति : माघ २, २०७५ बुधबार
उपचारका लागि अस्पताल भर्ना भएकी एक गर्भवती महिलालाई तामिलनाडुको एक अस्पतालमा एचआइभी पोजेटिभ भएको रगत दिइएपछि उनी पनि सङ्क्रमित भएकी छिन् । तामिलनाडु राज्यका प्रदेश स्वास्थ्यसचिव जे राधाकृष्णले गर्भवती महिलालाई एचआइभी पोजेटिभ भएका व्यक्तिले रगत दिएको थाहा भएको बताएका छन ।
पहिलेदेखि नै एचआइभी पोजेटिभ भएका ती व्यक्तिले अस्पतालका कर्मचारीलाई समेत खबर नगरी रक्तदान गरेको श्री राधाकृष्णले जानकारी दिए । उक्त व्यक्तिले जानाजान रक्तदान गरेको हो वा होइन भन्ने अनुसन्धान पनि भइरहेको अस्पताल प्रशासनले जनाएको छ । उहाँले दुर्भाग्यबस ती व्यक्तिमा एआइभी पोजेटिभ भएको जानकारी अस्पताललाई नभएको बताए ।
उक्त घटनामा प्रमुख जिम्मेवार देखिएका प्रयोगशालाका प्राविधिक र परामर्शदातालाई अवकाश दिइएको छ । पीडित महिलाका श्रीमानले गर्भमा रहेको बच्चामा एचआइभी सङ्क्रमित हुन नदिन सबै उपाय अपनाउन अस्पताल प्रशासनसँग आग्रह गरेका छन् । अस्पतालहरुमा एकजनालाई प्रयोग गरिएको सुई अर्को जनालाई लगाउँदा पनि यस्ता खालका रोग लाग्ने जनाइन्छ । समयमा नैं सचेत नहुँदा ठुलो समस्याको भागेदार हुनुपर्दछ ।