विश्वको सबैभन्दा धनी जोडीले २५ बर्षपछि डिभोर्स गर्दै
प्रकाशित मिति : पुस २५, २०७५ बुधबार
विश्वको सबैभन्दा धनी जोडीका रुपमा चर्चित जेफ बेजोज र उनकी पत्नी म्याकेन्जीले २५ बर्षलामो आफूहरुबीचको सम्बन्ध समाप्त गर्ने भएका छन् । एमजोनका सीइओ बेजोजले बुधबार ट्वीटरमार्फत डिभोर्स गर्न लागेको घोषणा गरेका हुन् ।
आफूहरुले २५ बर्ष लामो वैवाहिक सम्बन्धको अन्त्य गरेर बाँकी जीवन साथीका रुपमामात्र अगाडि बढाउने उनीहरुले जनाएका छन् । आफूहरुले एकअर्कालाई पाएकोमा र २५ बर्ष विताउन पाएकोमा भाग्यमानी रहेको बताउँदै वैवाहिक जीवनका हरेक बर्ष असाध्यै राम्रो भएको उनीहरुले बताएका छन् ।
५४ बर्षका बेजोज र ४८ बर्षकी म्याकेन्जीले के कारणले डिभोर्स गर्न लागेका हुन् भन्नेबारे भने केही खुलाएका छैनन् । सन् १९९० को दशकमा न्युयोर्कमा कामको दौरान भेटेर विवाह गरेका उनीहरु लगत्तै शियाटल बसाई सरेका थिए, जहाँ बेजोजले एमजोन खोलेका थिए ।
बेजोज अहिले विश्वका सबैभन्दा धनी व्यक्ति हुन् । उनको कुल सम्पत्ति १ सय ३७ बिलियन रहेको छ । उनका लागि यो डिभोर्स निकै खर्चिलो हुने जनाइएको छ । उनकी पत्नी म्याकेन्जीले कैयन उपन्यासहरु लेखेकी छिन् ।
गतबर्षमात्र यो जोडीले घरवारविहिन र कम आम्दानी हुनेहरुको हितमा गैरनाफामुलक संस्थामार्फत २ बिलियन डलर सहयोगको घोषणा गरेका थिए । उनीहरुका ४ जना बच्चाबच्चीहरु रहेका छन् । उनीहरुले आगामी दिनमा पनि साथी, बुबाआमा र विभिन्न परियोजनाहरुमा सहकर्मीका रुपमा काम गर्ने बताएका छन् ।