अमेरिकी राष्ट्रपतिको ८ मिनेट लामो सम्बोधन, पर्खाल बनाउन बजेट माग
प्रकाशित मिति : पुस २५, २०७५ बुधबार
अमेरिकी राष्ट्रपति डोनाल्ड ट्रम्पले राष्ट्रका नाममा सम्बोधन गर्दै मेक्सिकोसँगको सिमानामा पर्खाल निर्माणका लागि बजेटको माग गरेका छन् । सिमानामा पर्खाल निर्माणका लागि ट्रम्पले ५ दशमलव ७ बिलियन डलरको माग गरेका कारण खर्च विधयेक पारित हुन नसक्दा सरकार शटडाउन जारी रहेको बखत ट्रम्पको सम्बोधन आएको हो ।
ट्रम्पले सिमाक्षेत्रमा बढेको मानवीय र सुरक्षा संकटको सामना गर्न पर्खाल निर्माणका लागि बजेटको माग गरेका हुन् । तर राष्ट्रपति ट्रम्पले संसदलाई बाइपास गरेर सिमानामा पर्खाल निर्माणका लागि घोषणा गर्न सकिने भनिएको संकटकालको कदम भने रोजेनन् ।
आफ्नो झण्डै ८ मिनेट लामो सम्बोधनका क्रममा ट्रम्पले सिमानामा जारी संकटलाई आत्माको संकट र दिलको संकटका रुपमा ब्याख्या गरे । ट्रम्पको सम्बोधन अमेरिकामा सबै मुख्य टेलिभिजनहरुले प्रत्यक्ष प्रशारण गरेका थिए । राष्ट्रपति ट्रम्पले अमेरिकी सिमानामा स्टीलको पर्खाल निर्माण गर्न चाहन्छन्, जसका लागि ५ दशमलव ८ बिलियन डलरको खाँचो रहेको छ ।
यही विवादका कारण जारी सरकार शटडाउन अमेरिकी इतिहासकै दोश्रो लामो शटडाउन बनेको छ । जसका कारण लाखौं कर्मचारीहरु वेतलवी बनेका छन् भने सरकारका कैयन निकायहरुमा कामकाज ठप्प रहेको छ ।