ट्रम्पको आजको सम्बोधनको जवाफ पेलोसी र शुमरले दिने
प्रकाशित मिति : पुस २४, २०७५ मंगलबार
अमेरिकी राष्ट्रपति डोनाल्ड ट्रम्पले आज राती ९ बजे गर्ने राष्ट्रिय सम्बोधनको जवाफ प्रतिनिधिसभा सभामुख न्यान्सी पेलोसी र सिनेटमा डेमोक्रेटिक नेता चक शुमरले दिने भएका छन् । अमेरिकाको पूर्वीय समय अनुशार आज राती ९ बजे ट्रम्पले सिमाक्षेत्रबो संकटबारे विशेष सम्बोधन गर्नेछन्, जसको मुख्य अमेरिकी टेलिभिजनहरुले प्रत्यक्ष प्रशारण समेत गर्ने भएका छन् ।
ट्रम्पले ह्वाइट हाउसको ओभल अफिसबाट सम्बोधन सके लगत्तै पेलोसी र शुमरले संसदभवन क्यापिटल हिलबाट त्यसको जवाफ दिने भएका छन् । सिमाक्षेत्रमा पर्खाल निर्माणका लागि ट्रम्पले ५ दशमलव ७ बिलियन बजेट माग गरेका कारण भएको विवादले अमेरिकी सरकार शटडाउनको १८ औं दिनमा ट्रम्पको विशेष सम्बोधन आउन लागेको हो ।
सम्बोधनपछि बिहिबार राष्ट्रपति ट्रम्पले सिमाक्षेत्रको अवलोकन गर्ने कार्यक्रम समेत रहेको छ । डेमोक्र्याट्सहरुले भने सरकार शटडाउन अन्त्यका लागि विधयेकको तयारी गरिरहेका छन् । अमेरिकी ट्रेजरी डिपार्टमेन्ट र आईआरएस शटडाउनका कारण प्रभावित भएकाले त्यसको असर प्रत्यक्ष जनतामा परिरहेको छ । अध्यागमन अदालतहरु बन्द रहँदा अध्यागमन मुद्दाहरु बर्षौ पछाडि धकेलिएका छन् ।