२२ बर्षको अमेरिकी इतिहासमै सबैभन्दा लामो सरकार शटडाउन
प्रकाशित मिति : पुस २४, २०७५ मंगलबार
डिसेम्बर २२ देखि जारी अमेरिकी सरकार शटडाउन विगत २२ बर्षको इतिहासमा नै सबैभन्दा लामो शटडाउन बनेको छ । यसअगाडि सन् १९९५ को डिसेम्बर ५ देखि राष्ट्रपति बिल क्लिन्टनका पालामा २१ दिनसम्म अमेरिकी सरकार शटडाउन भएको थियो ।
आगामी शुक्रबारसम्म पनि शटडाउन अन्त्य नभए अमेरिकी सरकार शटडाउनको अहिलेसम्मको इतिहासमा नै यो शटडाउन सबैभन्दा लामो बन्नेछ । राष्ट्रपति डोनाल्ड ट्रम्पको एउटै कार्यकालमा अमेरिकी सरकार तेश्रो पटक शटडाउन भइरहेको छ ।
यसअगाडि राष्ट्रपति बराक ओबामाको कार्यकालमा सन् २०१७ को अक्टोबर १ देखि १६ दिनसम्म अमेरिकी सरकार शटडाउन भएको थियो । राष्ट्रपति बिल क्लिन्टनको पालामा भने २१ दिन र ५ दिन दुईपटक अमेरिकी सरकार शटडाउन भएको थियो ।
सन् १९९० मा राष्ट्रपति जर्जबुसका पालमा एकपटक ३ दिन अमेरिकी सरकार शटडाउन भएको थियो । राष्ट्रपति रोनाल्ड रेगनका पालामा ८ पटकमा जम्मा १३ दिनसम्म अमेरिकी सरकार शटडाउन भएको थियो ।
राष्ट्रपति जिम्मी कार्टरका पालामा ५ पटक अमेरिकी सरकार शटडाउन भएको थियो । कार्टरका पालामा सबैभन्दा लामो १८ दिनसम्म अमेरिकी सरकार शटडाउन भएको थियो । त्यो भन्दा अगाडि सन् १९७६ मा जेराल्ड फोर्डका पालामा पनि एकपटक अमेरिकी सरकार शटडाउन भएको थियो । अहिलेसम्म अमेरिकी सरकार २१ पटक शटडाउन भएको छ ।