जापानमा एक नेपालीको निधन
प्रकाशित मिति : पुस २२, २०७५ आईतबार
नेपालको म्याग्दी घर भई जापानमा लामो समयदेखि बस्दै आएका एक नेपालीको शनिवार इवाराकीमा निधन भएको छ ।
५१ वर्षिय गोपाल मल्लको शनिवार दिउँसो इवाराकी केनस्थित कोगा सिटीको हिगासी यामातामा रहेको साथीको कोठामा निधन भएको हो ।
विगत ३१ वर्ष देखि जापानमा रहेका मल्लका श्रीमती र ३ छोराहरु छन् । उनी लामो समयदेखि बेरोजगार रहेको र साथीभाइहरुसंग आश्रय लिएर जापानमा बस्दै आएको बताइएको छ ।
मल्लको प्रतिकुल स्वास्थ्य स्थिति र सो अनुसारको उचित ध्यान पुर्याउन नसकेका कारण मृत्यू भएको हुन सक्ने निकटवर्तीहरुको अनुमान छ ।
मल्लको शवलाई शनिवार सांझदेखि प्रहरीले जिम्मा लिएको र परिवारका सदस्यहरुसंग सम्पर्कको प्रयास भईरहेको बताईएको छ ।
घटना पश्चात दर्शन समाज जापानका पदाधिकारीहरु आवश्यक सहजीकरणका लागि त्यसतर्फ प्रस्थान गरेको समाचार समुद्रपारि डट कमले लेखेको छ ।
जापानी श्रीमतीसंग सम्बन्ध विच्छेद गरी मल्लले नेपालीसंग विवाह गरेका थिए । केही वर्ष अगाडिसम्म जापानमै रहेकी उनकी नेपाली श्रीमती हाल भने नेपालमा छिन् ।