आगामी सोमबारदेखि जापानबाहिर जाँदा १ हजार ‘डिपार्चर कर’ अनिवार्य तिर्नुपर्ने
प्रकाशित मिति : पुस २०, २०७५ शुक्रबार
जापान बाहिर जाने व्यक्तिले अबदेखि १ हजार येन कर तिर्नुपर्ने भएको छ र आगामी सोमवार अर्थात जनवरी ७ तारिक देखि हरेक व्यक्तिको १ हजार येन डिपार्चर कर लिने निर्णय भएसंगै जुनसुकै राष्ट्रका नागरिक भएपनि जापान बाहिर जाँदा यो कर तिर्नुपर्ने छ ।
जापान बाहिर जाने यक्तिले हरेक पटक देश छोड्दा यो रकम बुझाउनु पर्नेछ भने डिपार्चर कर हवाई भाडा, पानीजहाज र यात्रा शुल्कमाथि जोडिएर आउने बताइएको छ ।
जापानी सञ्चार माध्यमहरुले जनाएअनुसार सो सम्बन्धि नीति जापानको ब्यवस्थापिका संसदले गत अप्रिलमा पारित गरेको हो ।
यसरी उठाईएको रकम सन् २०२० मा हुने ओलम्पिक र प्यारा ओलम्पिकमा जापान आउने पर्यटकहरुका लागि आवश्यक सेवा, सुविधा बढाउन र सुधार ल्याउनमा तथा अन्य भौतिक संरचना बढाउनमा खर्च गरिने बताइएको छ ।
जापान आएको २४ घण्टामा जापान छोड्ने र २ वर्षमुनिका बालबालिका लागि भने यो कर लागू गरिने छैन । त्यस्तै आगामी सोमवारभन्दा अगावै टिकट लिइसकेका व्यक्तिहरुको हकमा पनि यो कर हालका लागि लाग्नेछैन ।
जापानमा घुम्न आउने पर्यटकको संख्या पछिल्ला बर्षहरुमा निकै बढेको छ । २०१८ मा पहिलोपटक ३० मिलियन पर्यटक भित्राएको जापानले २०२० सम्म बार्षिक ४० मिलियन पर्यटक भित्राउने लक्ष लिएको छ ।