यसरी एक्लै बित्यो राष्ट्रपति ट्रम्पको क्रिशमस र न्यु इयर ईभ
प्रकाशित मिति : पुस १९, २०७५ बिहीबार
अमेरिकी राष्ट्रपति डोनाल्ड ट्रम्पको क्रिशमस र नयाँ बर्षको स्वागत एक्लोपनमा नै वितेको छ । ११ दिनदेखि अमेरिकी सरकार शटडाउन जारी रहँदा राष्ट्रपतिको दैनिकी झण्डै ६ दिन कोठाभित्रै वितेको हो । सीएनएनले यसबारे रिपोर्ट प्रकाशित गरेको छ ।
इराकको आकस्मिक भ्रमणबाहेक राष्ट्रपतिले क्रिशमस र न्यु इयर इभ एक्लोपनमा नै काटेका छन् । सरकार शटडाउनका कारण उनको मार ए लागो रिसोर्ट जाने कार्यक्रम स्थगित भएको थियो । सरकार शटडाउन भएयता ट्रम्प ट्वीटरमा भने निकै सकृय भएका छन् । यो अवधिमा उनले ९८ वटा ट्वीट र रिट्वीट गरेका छन् ।
क्रिशमस इभको दिनमा ट्वीट गर्दै ट्रम्पले आफैले आफैलाई विचरा भन्दै डेमोक्र्याटहरु सिमा सुरक्षाका विषयमा सहमतिका लागि आउलान् भन्दै एक्लै ह्वाइटाहउसमा कुरेर बसेको बताएका थिए । यो अवधिमा ट्रम्पले सल्लाहकारहरुसँग फोनकल गरेर, टेलिभिजन हेरेर र ट्वीटर चलाएर बिताएको सीएनएनले जनाएको छ । यो बीचमा ट्रम्पले सिनेटर लिण्ड्से ग्राहम लगायतका केही नजिकका व्यक्तिलाई लन्चका लागि बोलाएका थिए । त्यो बाहेक उनले ओभर अफिसमा दैनिक केही घण्टा विताएका थिए ।
क्रिशमस इभदेखि डिसेम्बर २७ सम्म ट्रम्पका साथमा उनकी पत्नीपनि थिइन् । ट्रम्पले यो अवधिमा सुरक्षामा खटिएका व्यक्तिहरुबाहेक आफू लगभग एक्लै ह्वाइटहाउसमा विताएको बताएका छन् । मेसिनगनसहितका सुरक्षाकर्मीहरुबाहेक ह्वाइट हाउसमा अरु कोही नभएको र आफूले उनीहरुप्रति हात हल्लाउने गरेको ट्रम्पले बताएका छन् । सेक्रेट सर्भिस र सेनाका उनीहरु निकै महान रहेको, उनीहरुले कुनै षड्यन्त्र नगर्ने, हातहल्लाएको नरुचाउने र नमुस्काउने खालका रहेको ट्रम्पले बताए ।
क्रिशमस र सरकार शटडाउनका कारण कर्मचारीहरु बिदामा रहेका कारण ह्वाइटहाउस सुनसान रहेको थियो । सन् २००० मा आफ्नो कार्यकाल सकिने बेलामा राष्ट्रपति बिल क्लिन्टनले क्रिशमस ह्वाइटहाउसमा विताएयता ट्रम्प क्रिशमसमा ह्वाइट हाउसमा समय बिताउने पहिलो राष्ट्रपति हुन् । इराक भ्रमणबाट फर्केपछि राष्ट्रपति ट्रम्प ह्वाइटहाउसबाट एकपटकमात्र बाहिर निस्के, त्यो पनि उपराष्ट्रपति माइक पेन्सको निवासमा सँगै खानाखानका लागि । जहाँ माइक पेन्ससँग ट्रम्पका ज्वाई र कार्यकारी चिफ अफ स्टाफ समेत थिए ।
बुधबार संचारकर्मीसँग कुराकानी गर्दै ट्रम्पले आफूले छ सातदिन ह्वाइटहाउसमा एक्लै बिताउने क्रममा पीबीएस हेरेको समेत बताए । उनले यो अवधिमा आफू एकदम एक्लो रहेको बताए ।
बुधबार ट्रम्प ३८ दिनपछि गल्फ खेल्न निस्किएका थिए । नोभेम्बर २५ पछि उनी बुधबार गल्फ खेल्न निस्किए । ट्रम्पले भने – ‘मेरो पूरै परिवार यो अवधिमा फ्लोरिडामा रह्यो । तर सिमा सुरक्षाबारे सहमतिका लागि कोही आइहाल्ला कि भनेर म ह्वाइटहाउसमा एक्लै कुरेर बसें ।’