नेपाल सरकारले फिर्ता बोलायो अमेरिकासहित ११ देशका राजदूत, कात्तिक २० गतेभित्र फर्किनुपर्ने

सुरज घिमिरे

---

प्रकाशित मिति : आश्विन २९, २०८२ बिहीबार

अमेरिकामा रहेको नेपाली दूतावास । फोटो: खसोखास

नेपाल सरकारले अमेरिकासहित विभिन्न ११ देशमा रहेका आवासीय राजदूतलाई फिर्ता बोलाउने निर्णय गरेको छ।

बिहीबार बसेको मन्त्रिपरिषद् बैठकले अमेरिकासहित चीन, जर्मनी, इजरायल, मलेसिया, कतार, रुस, साउदी आरब, स्पेन, बेलायत र जापानका राजदूतलाई फिर्ता बोलाउने निर्णय गरेको हो।

उनीहरूलाई कात्तिक २० गतेभित्र नेपाल फर्किन निर्देशन दिइएको सरकारका प्रवक्ता एवम् सञ्चार तथा सूचना प्रविधि मन्त्री जगदीश खरेलले जानकारी दिए ।

मन्त्रिपरिषद् बैठकको निर्णय सार्वजनिक गर्दै मन्त्री खरेलले भने, ,‘चीन, जर्मनी, मलेसिया, इजरायल, कतार, रुस, साउदी अरब, स्पेन, संयुक्त अधिराज्य, संयुक्त राज्य अमेरिका, र जापानका लागि नेपाली आवासीय राजदूतहरूको रूपमा कार्यरत नेपाली राजदूतहरूलाई २०८२ कात्तिक २० गतेभित्र नेपाल फर्किन सक्ने गरी फिर्ता बोलाउने निर्णय भएको छ ।’

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

सरकारले फिर्ता बोलाएका नेपाली राजदूतहरूमा अमेरिकाका लागि नेपाली राजदूत लोक दर्शन रेग्मी, बेलायतका लागि नेपाली राजदूत चन्द्रकुमार घिमिरे, जापानका लागि नेपाली राजदूत दुर्गा बहादुर सुवेदी, रुसका लागि नेपाली राजदूत जङ्गबहादुर चौहान र स्पेनका लागि नेपाली राजदूत सनिल नेपाल रहेका छन् ।

यस्तै, चीनका लागि नेपाली राजदूत  प्राध्यापक डाक्टर कृष्ण प्रसाद ओली, जर्मनीका लागि नेपाली राजदूत शैल रुपाखेती, इजरायलका लागि नेपाली राजदूत प्राध्यापक धनप्रसाद पण्डित,  कतारका लागि नेपाली राजदूत रमेश चन्द्र पौडेल, साउदी अरबका लागि नेपाली राजदूत नरेश विक्रम ढकाल र मलेसियाका लागि नेपाली राजदूत डाक्टर नेत्र प्रसाद तिमिल्सिना रहेका छन् ।