नेपाल क्रिकेट संघसँगको सम्झौता त्याग्ने सन्दीप लामिछानेको घोषणा
प्रकाशित मिति : बैशाख ३१, २०८२ बुधबार
नेपाली राष्ट्रिय क्रिकेट टोलीका खेलाडी सन्दीप लामिछानेले नेपाल क्रिकेट सङ्घ (क्यान)को केन्द्रीय सम्झौता अन्तर्गत नरहने निर्णय गरेका छन्। यो निर्णय व्यक्तिगत र व्यावसायिक विकासको उद्देश्यले लिइएको उनले बताएका छन्।
सामाजिक सञ्जालमा एक भावनात्मक सन्देश जारी गर्दै उनले भनेका छन्, “धेरै सोचविचारपछि मैले यस पटक क्यानको केन्द्रीय सम्झौता नलिने निर्णय गरेको छु। यो क्रिकेट वा मेरो देशबाट टाढा जाने कदम होइन, बरु व्यक्तिगत र व्यावसायिक रूपमा अगाडि बढ्ने प्रयास हो।”
उनले आफ्नो देशप्रति वफादारी र क्रिकेटप्रतिको जोस सधैँ कायम रहने प्रतिबद्धता व्यक्त गरे। नेपाल क्रिकेट सङ्घप्रति कृतज्ञता व्यक्त गर्दै उनले भने, “मेरो यात्रामा क्यानको निरन्तर समर्थन अमूल्य छ। नेपाल क्रिकेट र मेरो व्यक्तिगत वृद्धिमा उनीहरूको योगदान अतुलनीय छ।”
यो निर्णयले क्रिकेट प्रशंसकहरूबिच मिश्रित प्रतिक्रिया उत्पन्न भएको छ। कतिपयले उनको व्यक्तिगत निर्णयको सम्मान गरेका छन् भने कतिपयले उनलाई टोलीमा फर्कन आग्रह गरेका छन्।
लामिछानेले आफ्नो भविष्यको योजनाबारे थप खुलासा नगरे पनि उनले क्रिकेट र अन्य क्षेत्रमा नयाँ सम्भावनाहरू खोज्ने सङ्केत दिएका छन्। उनले भनेका छन्, “जीवन एक यात्रा हो र म नयाँ ऊर्जा र खुला हृदयका साथ अगाडि बढ्न उत्साहित छु।”