पोल्यान्डमा अन्धाधुन्ध गोली प्रहारबाट ६ जनाको मृत्युपछि दुई दिनको राष्ट्रिय शोक घोषणा
Photo: Daniel SilvZ /Unsplash
पोल्यान्डको ऐतिहासिक सहर क्राकोवमा शनिबार एक २४ वर्षीय उग्र-दक्षिणपन्थी युवकले अन्धाधुन्ध गोली चलाउँदा ६ जनाको मृत्यु भएको छ भने १५ जना घाइते भएका छन्। घटनापछि पोल्यान्ड सरकारले आइतबारदेखि लागू हुने गरी दुई दिने राष्ट्रिय शोकको घोषणा गरेको छ।
आक्रमणकारीलाई प्रहरीले गोली प्रहार गरी नियन्त्रणमा लिएको छ र उनको उपचार भइरहेको छ। पोल्यान्डका रक्षा मन्त्रीले यस घटनालाई “आतङ्ककारी कार्य” को संज्ञा दिएका छन्।
घटना क्राकोवको पुरानो सहर ‘ओल्ड टाउन’ मा स्थित प्रसिद्ध पर्यटकीय स्थल मेन स्क्वायरमा भएको थियो। आइतबार बिहान पनि अनुसन्धान जारी रहेकाले उक्त क्षेत्र आंशिक रूपमा बन्द गरिएको थियो। दोस्रो विश्वयुद्धपछि पहिलो पटक सेन्ट मेरी ब्यासिलिकाको उच्च स्तम्भबाट हरेक घण्टा बजाइने परम्परागत धुन ‘स्टेफन्स ट्रम्पेट कल’ पीडितहरूप्रति श्रद्धाञ्जली अर्पण गर्न रातभरका लागि बन्द गरिएको थियो।
प्रहरी अनुसन्धानका क्रममा आक्रमणकारीको घरमा उनका बुबा, आमा र बहिनीको शव भेटिएको छ। उनीहरूको पनि गोली हानेर हत्या गरिएको प्रहरीको अनुमान छ।
ब्रसेल्सबाट क्राकोव भ्रमणमा आएकी मारी-आन्ज कोलेअरले सामाजिक सञ्जालमा लेख्दै भनिन्, हामी आफ्नो ज्यान जोगाउन भाग्न सफल भयौँ। चारैतिर गोली चलेको आवाज आइरहेको थियो र हामी नजिकैको एउटा पसलको भुइँमा ढलेर ज्यान जोगियौँ। केही मानिसहरूले ज्यान गुमाएको आफ्नै आँखाले देख्यौँ, त्यो निकै भयानक दृश्य थियो।
त्यस्तै, बेलायती नागरिक नील थ्याक्सटन र उनकी श्रीमतीले पनि पसलका कर्मचारीको सहयोगमा भित्री कोठामा ढोका बन्द गरेर ज्यान बचाएको बताएका छन्।
प्रहरीका अनुसार मृत्यु हुनेहरूमा चार महिला र दुई पुरुष रहेका छन्। जसमध्ये चार जना पोलिस नागरिक, एक जना बेलायती नागरिक र एक जना अन्य विदेशी नागरिक रहेका छन्। घाइते हुनेहरूमा बेलायत, पोर्चुगल, रुस, जर्मनी र अस्ट्रियाका नागरिकहरू रहेका छन्।
आक्रमणकारीलाई रोक्ने क्रममा दुई प्रहरी अधिकारी गम्भीर घाइते भएका छन्। उनीहरूमध्ये एक जना अझै कोमामा छन् भने अर्का एक जनाको होस आएको छ। क्षेत्रीय गभर्नरले ती प्रहरीहरूको साहसले गर्दा थप ठूलो क्षति हुनबाट जोगिएको बताएका छन्।
पोल्यान्डका गृह मन्त्री मार्चिन किर्विन्स्कीका अनुसार आक्रमणकारी युवा उग्र-दक्षिणपन्थी विचारधाराबाट प्रभावित थिए। अनुसन्धानका क्रममा उनको घर र गाडीबाट कुल ११ वटा हतियार बरामद गरिएको छ। आक्रमणकारी र उनका बुबा दुवैसँग हतियार राख्ने कानुनी अनुमतिपत्र थियो।
पोल्यान्डमा यस्ता ठूला गोलीकाण्डका घटनाहरू दुर्लभ मानिन्छन्। यस घटनाले सिङ्गो देशलाई नै स्तब्ध बनाएको छ।