क्याटलन मतकेन्द्र प्रहरीको ‘नियन्त्रणमा’


प्रकाशित मिति : आश्विन १५, २०७४ आईतबार

स्पेनमा प्रहरीले त्यहाँको उत्तरपूर्वी क्याटालोनियामा आइतबार हुन लागेको स्वतन्त्रतासम्बन्धी जनमत संग्रह रोक्नका लागि प्रयासहरु तीब्र बनाएको छ।

कैयौं मतकेन्द्रहरु प्रहरी अधिकारीहरुले बन्द गरिदिएका छन्।

स्पेनको केन्द्रीय सरकार उक्त जनमत संग्रहलाई गैरकानूनी ठान्छ।

मतदान केन्द्रका रुपमा तोकिएका २३सयभन्दा बढी विद्यालयमध्ये १३ सयजति प्रहरीले बन्द गरिदिएका हुन्।

प्रहरीले क्षेत्रीय सरकारको सञ्चार केन्द्रमा नियन्त्रण जमाएको छ।

पहिचान

७५ लाख मानिस बस्ने क्याटालोनिया धनी क्षेत्र मानिन्छ। त्यहाँको आफ्नै खालको भाषा र संस्कृति छ।

त्यहाँ अहिलेपनि धेरै हदसम्म स्वायत्तता छ।

तर स्पेनी संविधान अन्तर्गत त्यसलाई छुट्टै मुलुकको रुपमा मान्यता दिइएको छैन।

क्याटालनस्वतन्त्रता पक्षधर कैयौंले मतदान केन्द्रहरु पहिलेनै ओगटेर बसेका छन्।

आइतबारको मतदानमा दशौं हजार मानिस सहभागी हुने अपेक्षा गरिएको छ।

उक्त मतदानलाई स्पेनी संवैधानिक अदालतले अवैधानिक घोषणा गरिसकेको छ।

कब्जा

केन्द्रीय सरकारका निकायहरुले मतदान रोक्न हजारौं प्रहरी पठाएको छ।

उनीहरुलाई क्याटालोनियाका क्षेत्रीय प्रहरीले सहयोग गरिरहेका छन्।

प्रहरी अधिकृतहरुले मतपत्र जस्ता वस्तु पनि कब्जामा लिएका छन्।

अभियोजनकर्ताहरुले मतदानसम्बन्धी वेबसाइट बन्द गर्न र जनमत संग्रह आयोजना गर्ने अधिकारीहरुलाई पक्रन आदेश दिएका छन्।

क्याटलन नेताहरुले जनमतसंग्रह पूर्वनिर्धारित योजना अनुसार नै अगाडि बढ्ने बताएका छन्।

BBC Nepali

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com