६ महिनामा २८० नेपालीले पाए अमेरिकी अदालतबाट एसाइलम, ८ हजार मुद्दा विचाराधिन
प्रकाशित मिति : बैशाख २३, २०८१ आईतबार
चालु आर्थिक बर्ष २०२४ को ६ महिनामा अमेरिकी अध्यागमन अदालतबाट २८० जना नेपालीहरुको एसाइलम स्वीकृत भएको छ । गत अक्टोबरदेखि मार्चसम्मको एक्जुकेटिभ अफिस फर इमिग्रेशन रिभ्युको तथ्यांक अनुशार यो अवधिमा ३४५ जना नेपालीहरुको एसाइलमको मुद्दा अदालतबाट फैसला भएकोमा ६५ जनाको एसाइलम भने अस्वीकृत भएको छ ।
सुरुदेखि अहिलेसम्म अमेरिकी अदालतबाट एसाइलम स्वीकृत हुने नेपालीहरुको संख्या ६ हजार ६ सय ५५ रहेको छ भने २२६७ जना नेपालीहरुको एसाइलम अदालतबाट अस्वीकृत भएको थियो । ९९ जना नेपालीहरुलाई भने अन्य प्रकारको राहत प्रदान गरिएको थियो ।
मार्चसम्मको तथ्यांक अनुशार अहिले अमेरिकाका अध्यागन अदालतमा नेपालीका विचाराधिन एसाइलमका मुद्दाको संख्या झण्डै ८ हजार ८३ रहेको छ । जसमध्ये ३ हजार मुद्दा न्युयोर्कका अदालतहरुमा विचाराधिन रहेका छन् । दोश्रोमा सान एन्टोनियोको अदालतमा १८९३ मुद्दा विचाराधिन रहेका छन् भने सान फ्रान्सिस्कोको अदालतमा १४५० मुद्दा विचाराधिन रहेका छन् ।
सिधै युएससीआईएसबाट लगभग एसाइलम पाउन छाडे नेपालीले
अमेरिकामा सिधै युएससीआईएसबाट नेपालीहरुले लगभग एसाइलम पाउन छाडेका छन् । अमेरिकी सरकारको डिपार्टमेन्ट अफ होमल्याण्ड सेक्युरिटीले युएससीआईएसबाट सिधै एसाइलम स्वीकृत हुने नेपालीको संख्या २०२२ मा जम्मा १३ जनामात्रै रहेको खुलासा गरेको छ । यो संख्या २४ बर्ष यताकै सबैभन्दा कम हो ।
नेपालमा माओवादी युद्ध समाप्त भएको १८ बर्ष भइसक्दापनि माओवादीका कारण नै नेपाल फर्कन खतरा रहेको भन्दै अहिलेपनि नेपालीहरुले अमेरिकामा शरणका लागि आवेदन दिने भएकाले उनीहरुको आवेदन युएससीआईएसबाट स्वीकृत हुन छाडेको हो ।
त्यो अगाडि आर्थिक बर्ष २०२१ मा १६ जना नेपालीहरुले युएससीआईएसबाट सिधा एसाइलम पाएका थिए भने आर्थिक बर्ष २०२० मा पनि युएससीआईएसबाट सिधै एसाइलम स्वीकृत हुने नेपालीहरु १६ जनामात्रै थिए । आर्थिक बर्ष २०१९ मा युएससीआईएसबाटै एसाइलम स्वीकृत हुने नेपालीहरु ३५ जना रहेका थिए ।
सन् २००० मा युससीआइएसबाटै एसाइलम पाउने नेपालीको संख्या १८ मात्र रहेको थियो भने सन् २००१ मा २१ रहेको थियो । त्यसपछि सन् २००२ मा ६९ जना नेपालीहरुले युएससीआईएसबाटै एसाइलम पाएका थिए । सन् २००२ मा माओवादी जनयुद्ध उत्कर्षमा पुगेको थियो भने मुलुकमा संकटकाल लागु भएको थियो ।
जनयुद्ध उत्कर्षमा पुग्दै गर्दा अमेरिकामा एसाइलम पाउने नेपालीहरुको संख्या पनि बढ्दै गयो । सन् २००३ मा युएससीआइएसबाटै एसाइलम पाउने नेपालीहरु १४२, सन् २००४ मा १६३, सन् २००५ मा २२८ र सन् २००६ मा २११ जना नेपालीहरुले युएससीआईएसबाटै एसाइलम पाए । सन् २००६ मा माओवादी शान्ति प्रकृयामा आएको थियो ।
सन् २००७ मा २८३, सन् २००८ मा ३४९ र सन् २००९ मा ५ सय जना नेपालीहरुले युएससीआईएसबाटै एसाइलम प्राप्त गरे । सन् २०१० मा ४०८ र सन् २०११ मा ४१५ जना नेपालीहरुले युएससीआईएसबाटै एसाइलम प्राप्त गरे । त्यसपछि सन् २०१२ मा ५८० जना नेपालीहरुले युएससीआईएसबाटै एसाइलम प्राप्त गरेका थिए ।
त्यसपछि भने युएससीआईएसबाटै एसाइलम प्राप्त गर्ने नेपालीहरुको संख्या घट्दै गयो । सन् २०१३ मा ४६८, सन् २०१४ मा २५७, सन् २०१५ मा ३५४, सन् २०१६ मा २३८, सन् २०१७ मा १४९, सन् २०१८ मा ९७ जना नेपालीहरुले युएससीआईएसबाट एसाइलम पाए ।
सन् २००० भन्दा अगाडि युएससीआईएसबाट एसाइलम स्वीकृत हुने नेपालीहरुको संख्या निकै कम रहेको थियो । सन् १९९९ मा १३ जना, सन् १९९८ मा १७ जना, सन् १९९७ मा ३ जना र सन् १९९६ मा ४ जना नेपालीहरुले युएससीआईएसबाटै एसाइलम प्राप्त गरेको डिपार्टमेन्ट अफ होमल्याण्ड सेक्युरिटीले जनाएको छ ।