अमेरिकाको कामदार भिसाको लोटरी दर्ता गर्नेहरु गतबर्षको तुलनामा ३ लाख कम
प्रकाशित मिति : बैशाख १८, २०८१ मंगलबार
अमेरिकाको कामदार भिसा एचवान बीका लागि मार्चमा खोलिएको लोटरीबाट १ लाख १४ हजार जनालार्ई छनौट गरिएको छ । आगामी आर्थिक बर्षको कामदार भिसा एचवान बीका लागि लोटरीमा प्रयाप्त आवेदनहरु प्राप्त भएको युएससीआईएसले जनाएको छ । यसपटक हरेक ४ जना आवेदकमध्ये एकजना लोटरीमा छनौट भएका छन् । उनीहरुमध्ये ८५ हजारले अमेरिकाको कामदार भिसा प्राप्त गर्नेछन् ।
गतबर्षको तुलनामा यसपटक कामदार भिसाको लोटरीमा दर्ता संख्यामा उल्लेख्य गिरावट आएको छ । गतबर्षको तुलनामा यो पटक झण्डै ३ लाख कम आवेदनहरु प्राप्त भएका थिए । गतबर्ष ७ लाख ८० हजार ८ सय ८४ आवेदनहरु लोटरीका लागि दर्ता गरिएकोमा यसपटक जम्मा ४ लाख ७९ हजार ९ सय ५३ आवेदनहरुमात्र दर्ता भए । जुन झण्डै ३९ प्रतिशत कम हो ।
यो बर्ष रोजगारदाताको संख्यामा भने गतबर्षको तुलनामा सामान्य बृद्धि देखिएको छ । गतबर्ष ५२ हजार रोजगारदाताहरु रहेकोमा यो बर्ष ५२ हजार ७ सय रोजगारदाताहरु रहेको युएससीआईएसले जनाएको छ । गतबर्षको लोटरीमा सुरुमा १ लाख १० हजार आवेदनहरु छनौट गरिएकोमा पछि यसमा बृद्धि गरेर १ लाख ८८ हजार आवेदन छनौट गरिएको थियो । जसका कारण छनौट भएका अधिकांशले भिसा पाएनन् । अघिल्ला बर्षहरुमा भने लोटरीमा छनौट भएका आधाभन्दा धेरैले भिसा पाएका थिए ।
यसपटकको लोटरीमा छनौट भएकाहरुको बाँकी प्रकृया अप्रिलदेखि सुरु भएको छ भने उनीहरुले आगामी अक्टोबरमा काम सुरु गर्नेगरी भिसा पाउन सुरु गर्नेछन् । अमेरिकामा कामदार भिसा एचवानबी प्राप्त गर्ने नेपालीहरुको संख्या पनि उल्लेख्य रहेको छ ।
यो भिसाका लागि अमेरिका आउन चाहने व्यक्तिले आफै अनलाइनमा गएर सिधा आवेदन दिन सक्दैन । यदि उसलाई अमेरिकामा रहेको कम्पनीले रोजगारको अफर गरेको छ भनेमात्र उक्त रोजगारदाता कम्पनी वा उसको प्रतिनिधि वा उसको कानुन व्यवसायीलेमात्र अनलाइनमा गएर आवेदन दर्ता गर्नसक्छ । एचवानबी भिसामार्फत आउने पदका लागि लाभग्राहीको कम्तीमा स्नातक वा त्यो भन्दामाथिको शिक्षा हासिल गरेको वा सो सरह हुन जरुरी छ ।
कम्पनीमा गर्ने काम उक्त डिग्री भएको व्यक्तिलेमात्र गर्नसक्ने पुष्टी हुनुपर्छ । वा कम्पनीको कामका लागि डिग्री हुनु सामान्य मापदण्ड भएको पुष्टी हुनुपर्छ । यसको मतलव कम्पनी यदि डिग्री नचाहिने खालको छ भने किन डिग्री होल्डरको आवश्यकता छ भन्ने पुष्टी गर्नुपर्छ वा कम्पनी डिग्री चाहिने खालको हुनुपर्छ । लाभग्राही अमेरिकाको मान्यताप्राप्त कलेज वा युनिभर्सिटीबाट स्नातक वा त्योभन्दा माथिको डिग्री हासिल गरेको हुनुपर्छ । अमेरिकामा डिग्री हासिल गरेर स्वदेश फर्किसकेको छ भने पनि फरक पर्दैन ।
वा, अमेरिकाको स्नातक वा त्योभन्दामाथिको डिग्रीसरह मान्यता पाउनेगरी विदेशको डिग्री प्राप्त गरेको हुनुपर्छ । वा, विशेष पेशामा आवद्ध भएर काम गर्नका लागि राज्यका तर्फबाट लाइसेन्स प्राप्त गरेको हुनुपर्छ । जुन लाइसेन्सले विशेष पेशाको अभ्यासका लागि अनुमति प्रदान गर्छ । वा, कुनै विषयगत शिक्षा वा प्रशिक्षण प्राप्त गरेको हुनुपर्छ । जुन विशेष डिग्री सरह नै हुन्छ । यसो हुँदा सम्बन्धित विषयमा विज्ञ भएको हुनुपर्छ ।
सामान्यता यी मापदण्डहरु पूरा गरेको रोजगारदाता र लाभग्राहीले अमेरिकाको कामदार भिसा एचवानबी बाट फाइदा लिनसक्छन् । चालु आर्थिक बर्षको चार महिनामा मात्र ३९५ जना नेपालीहरुले कामदार भिसा एचवान बी पाइसकेका छन् भने ९९ जना उनीहरुका आश्रितहरुले एचफोर भिसा पाइसकेका छन् । गत आर्थिक बर्ष २०२३ मा ११३५ जना नेपालीहरुले अमेरिकाको कामदार भिसा एच प्राप्त गरेका थिए ।