अमेरिकामा कागजपत्रविहीन आप्रवासीहरूलाई व्यावसायिक उडानमा प्रतिबन्ध लगाउने बिल
प्रकाशित मिति : चैत्र ३०, २०८० शुक्रबार
एक वरिष्ठ रिपब्लिकन सांसदले कागजपत्रविहीन आप्रवासीहरूलाई अमेरिकामा उडान गर्न प्रतिबन्ध लगाउने बिल संसदमा ल्याउन लागेका छन् । प्रतिनिधिसभामा होमल्याण्ड सेक्युरिटी कमिटीका अध्यक्ष रिपब्लिकन सांसद मार्क ग्रीनले बाएइडेन प्रशासनबाट ल्याइएका अध्यागमनका कानुनी मार्गहरू बन्द गर्ने प्रयासमा यस्तो बिल ल्याउन लागेका हुन् ।
अमेरिकीहरूले उडानमा चढ्नको लागि उचित पहिचान देखाउनुपर्ने तर कागजपत्रविहीनले त्यसो गर्न आवश्यक नहुने विद्यमान अवस्थाको अन्त्य गरेर कागजपत्रविहीन आप्रवासीहरूले पनि अमेरिकी नागरिकहरू जस्तै कानूनहरूको पालना गर्नुपर्ने सांसद ग्रिनले बताएका छन् । यी कानूनहरू लागू नहुँदा राष्ट्रिय सुरक्षामा गम्भीर खतरा उत्पन्न हुने उनको भनाई छ ।
ग्रीनको बिलले विशेष रूपमा उचित परिचयपत्रहरु नहुनेहरुलाई विमानस्थलका सुरक्षा चेकपोइन्टहरू मार्फत अगाडि बढ्नमा रोक लगाउने लक्ष्य लिएको छ । संघीय हिरासतमा हुँदा प्राप्त अध्यागमन कागजपत्र देखाएर हाल कागजपत्रविहीनहरु अमेरिकामा विमानमार्फत यात्रा गर्न पाउने अनुमति दिइएकोमा यो बिलको उद्देश्य उक्त प्रावधानलाई रोक्नु रहेको छ ।
बिलले अध्यागमन कागजात देखाएर विमानमा चढ्ने खोज्नेहरुलाई विदेशी र आन्तरिक विमान कम्पनीहरूले विमानमा चढ्न नदिने प्रावधान ल्याउनेछ । बाइडेन प्रशासनले आप्रवासीहरुलाई सिमाक्षेत्रमा पक्राउ गरेका कागजात वा सीबीपी वान एप्लीकेशनबाट विमानमा चढ्न अनुमति दिंदा अमेरिकनहरुलाई जोखिममा पारेको सांसद ग्रिनको भनाई छ ।
यो बिलका अहिलेसम्म १७ जना सांसदहरु को स्पोन्सर रहेका छन् । रिपब्लिकन सिनेटर माइक लीले पनि सिनेटमा यस्तै प्रकारको बिलको समर्थन गरिरहेका छन् । यो बिल प्रतिनिधिसभाबाट पारित भएपनि सिनेटबाट पारित हुनभने सहज छैन ।