ग्रिनकार्ड लगायतका आवेदनमा रिसिप्ट प्राप्त हुन १४ दिनसम्म लाग्नसक्ने युएससीआईएसबाट प्रष्ट
प्रकाशित मिति : चैत्र ३०, २०८० शुक्रबार
युएससीआईएसले ग्रिनकार्ड लगायतका आवेदनका सन्दर्भमा लकबक्स स्थानहरुमा प्राप्त हुने आवेदनहरुको संख्यामा अत्याधिक बृद्धि भएको जनाएको छ । जसको कारणले गर्दा रिसिप्टहरु जारी हुनमा केही ढिलाई भइरहेको युएससीआईएसले प्रष्ट पारेको छ । रिसिप्टहरु जारी हुनमा ढिलो भएतापनि आवेदनहरू पोस्टमार्क गरिएको मितिमा आधारित रहेर प्रक्रियामा लगिएको युएससीआईएसको भनाई छ ।
युएससीआईएसले भनेको छ हामीले हाम्रो लकबक्स स्थानहरूमा आवेदनहरुमा वृद्धि भएको अनुभव गरेका छौं । त्यसैले रिसिप्ट प्राप्त हुन १० देखि १४ क्यालेण्डर दिन लाग्नसक्छ ।
रिसिप्ट प्राप्त गर्नको लागि मानक समय सीमा सामान्यतया ७ देखि १० दिनको वरिपरि हुन्छ। तर अहिले त्योभन्दा बढी समय लागिरहेको युएससीआईएसको भनाई छ । ७ देखि १० दिनमा रिसिप्ट प्राप्त नहुँदा कतिपय आवेदकहरु आफ्नो आवेदन समयमा नै नपुगेको हो कि भन्ने चिन्तामा समेत रहने गरेका छन् ।
युएससीआईएसका अनुशार रिसिप्ट प्राप्त हुन अहिले दुईदेखि तीनहप्तासम्म लाग्नसक्ने देखिएको छ । त्यसैले रिसिप्ट प्राप्त नभएकोबारे युएससीआईएसमा सम्पर्क गर्नु अगाडि कम्तीमा पनि १४ दिन कुर्न सुझाव दिइएको छ ।
अनलाइनबाट फाइल गरिने आवेदनहरुका सन्दर्भमा भने तुरुन्तै आवेदन प्राप्त भएकोबारे कन्फर्मेशन नम्बर प्राप्त हुन्छ । त्यसैले आवेदकहरुलाई उपलब्ध भएसम्म सकभर अनलाइनबाट आवेदन फाइल गर्न सुझाव दिइएको छ । अनलाइनबाट आवेदन फाइल गर्दा युएससीआईएसका सूचनाहरु पनि अनलाइनमा सिधै प्राप्त गर्न सकिन्छ । जसले गर्दा पत्रहरु हराउने सम्भावना हुँदैन भने पत्रको जवाफ दिनका लागि समेत थप समय प्राप्त हुन्छ ।