रोजगारमा आधारित पहिलो श्रेणीको ग्रिनकार्ड मेमा पनि करेन्ट, टसमस नहुँदा अन्य श्रेणीलाई तनाव
प्रकाशित मिति : चैत्र २९, २०८० बिहीबार
रोजगारमा आधारित पहिलो श्रेणीको ग्रिनकार्ड मे पनि करेन्ट हुने भएको छ । अर्थात् मे महिनामा पनि पहिलो श्रेणीको आवेदन आई १४० का साथमा ग्रिनकार्ड आवेदन आई ४८५ फाइल गर्न पाइने भएको छ ।
तर मे महिनाका लागि युएससीआईएसले भिसा बुलेटिनको फाइनल एक्सन डेटलाई आधार मान्दा अमेरिकाभित्रै हुनेहरुका सन्दर्भमा रोजगारमा आधारित अन्य श्रेणीको ग्रिनकार्ड कुरिरहेकाहरुलाई भने थप निराश बनाएको छ । अर्कातर्फ अप्रिलका तुलनामा अन्य श्रेणीको फाइनल एक्सन डेट टसमस नहुँदा यी श्रेणीहरुमा ग्रिनकार्ड कुरिरहेकाहरुलाई थप तनाव भएको छ ।
रोजगारमा आधारित दोश्रो र तेश्रो श्रेणीको ग्रिनकार्डका लागि मे महिनामा आई ४८५ ग्रिनकार्ड आवेदन फाइल गर्न पाइने प्राथमिकता मिति क्रमशः १५ जनवरी २०२३ र २२ नोभेम्बर २०२२ रहेको छ । अप्रिलमा पनि यही मिति कायम थियो । जसले गर्दा ग्रिनकार्ड आवेदन फाइल गर्नका लागि प्रतिक्षा अवधि अझ बढेको छ ।
रोजगारमा आधारित तेश्रो श्रेणीको अनस्कील्ड अन्य कामदारका सन्दर्भमा पनि ग्रिनकार्ड आवेदन फाइल गर्नका लागि प्रतिक्षा अवधि मे महिनामा अझ बढेको छ । मे महिनामा ८ अक्टोबर २०२० भन्दा अगाडि प्राथमिकता मिति भएकाहरुले ग्रिनकार्ड फाइल गर्न सक्नेछन् ।
आई १४० विचाराधिन रहेको अवस्थामा आवेदकले आई ४८५ फाइल गरिसकेपछि आवेदन विचाराधिन रहँदासम्म वर्क परमिट प्राप्त गर्न, सोसल सेक्युरिटी नम्बर प्राप्त गर्न र एड्भान्स परोलमा अमेरिकाबाहिर यात्रा गर्न समेत सकिन्छ । तर यसबारे निर्णय गर्नु अगाडि आफ्नो केसको प्रकृतिबारे लाइसेन्सप्राप्त कानुन व्यवसायीसँग सल्लाह लिनुपर्छ ।