ग्रिनकार्ड लगायतका आवेदनबारे निर्णय हुन लाग्ने औषत अवधिबारे युएससीआईएसको नयाँ तालिका
प्रकाशित मिति : चैत्र २१, २०८० बुधबार
ग्रिनकार्ड लगायतका आवेदनबारे निर्णय हुन लाग्ने औषत अवधिबारे युएससीआईएसले नयाँ फ्याक्ट सिट जारी गरेको छ । जसमा केही आवेदनका सन्दर्भमा युएससीआईएसले छिटो निर्णय प्रदान गर्नमा अर्थात् आवेदनबारे निर्णय गर्ने समय घटाउनमा उललेख्य प्रगति गरेको छ । फ्याक्ट सिटमा भर्खरै प्रकाशित डाटा समावेश गरिएको छ जसमा उच्च आवेदन प्राप्त हुने फारमहरूको लागि औषत प्रशोधन समय अघिल्लो आर्थिक वर्षको तुलनामा उल्लेखनीय रूपमा कम भएको छ।
एसाइलम आवेदकहरू र केही परोलहरूबाट वर्क परमिटका लागि निर्णय गर्न अहिले औषतमा ३० दिनभन्दा कम समय लाग्ने गरेको छ भने अमेरिकी नागरिकता आवेदनबारे निर्णय आउन औषतमा सबा ५ महिना लाग्ने गरेको छ । नागरिकता आवेदनमा लाग्ने समय सन् २०१६ यताकै सबैभन्दा कम हो । त्यस्तै ग्रिनकार्ड आवेदन विचाराधिन रहँदा वर्क परमिटका लागि झण्डै साढे ३ महिना लाग्ने गरेको छ जुन २०१७ यताकै सबैभन्दा कम हो । युएससीआईएसका अनुशार अहिले कुनै पनि प्रकारका वर्क परमिटबारे औषतमा साढे ३ महिनाभन्दा अगाडि निर्णय गरिएको छ । एड्भान्स परोल डकुमेन्टमा निर्णय आउन झण्डै साढे ४ महिना लाग्ने गरेको छ, जुन सन् २०१८ यताकै कम हो । गैर आप्रवासी कामदार भिसाको नियमित आवेदन आई १२९ मा पनि झण्डै पौने ३ महिनामात्र लाग्ने गरेको छ ।
केहि अन्य आवेदनमा निर्णयका लागि समय कम गर्न थप प्रगति गर्न आवश्यक रहेको युएससीआईएसले स्वीकार गरेको छ । एसाइलम स्वीकृत हुनेका परिवारका लागि फाइल गरिने फर्म आई ७३० तथा यु भिसामा निर्णय अवधि उच्च ब्याकलगका कारण लक्ष्यित भन्दा निकै धेरै रहेको युएससीआईएसले स्वीकार गरेको छ । तर नयाँ स्थापित मानवीय आवेदन हेर्ने सर्भिस सेन्टरले त्यसमा उल्लेख्य प्रगति गरेको युएससीआईएसले जनाएको छ ।
एकबर्ष अगाडि एसाइलम स्वीकृत भएको आधारमा ग्रिनकार्डका लागि लाग्ने औषत अवधि अहिले झण्डै १४ महिना छ भने रोजगारमा आधारित ग्रिनकार्डका लागि सबा ७ महिना रहेको छ । त्यस्तै परिवारमा आधारित ग्रिनकार्डका लागि लाग्ने अवधि भिसा करेन्ट भएको अवस्थामा औषतमा झण्डै साढे ९ महिना रहेको छ । १ बर्षभन्दा बढी अमेरिका बाहिर बस्नुपर्ने ग्रिनकार्डवाहकका लागि रिइन्ट्री परमिट आवेदनमा निर्णय आउन झण्डै साढे १५ महिना लाग्ने गरेको छ । ग्रिनकार्डको नविकरणका लागि आई ९० फर्ममा निर्णय आउन औषतमा सबा ३ महिना लाग्ने गरेको छ ।
त्यस्तै बार्षिक भिसाको कोटा रहेको ग्रिनकार्ड आवेदनहरुका सन्दर्भमा आफूहरुले अमेरिकी विदेशमन्त्रालयबाट जारी हुने भिसा बुलेटिनका आधारमा निर्णय गर्ने भएकाले त्यस्ता आवेदनहरुमा निर्णयका लागि लामो समय लाग्ने गरेको युएससीआईएसले जनाएको छ । उदाहरणका लागि परिवारमा आधारित केही श्रेणीका ग्रिनकार्डका लागि फाइल गरिने आई १३० आवेदनका सन्दर्भमा निर्णय गर्नु अघि भिसा उपलब्ध भए नभएको निर्धारण गर्न भिसा बुलेटिन प्रयोग गर्ने गरेको र भिसा करेन्ट हुन लामो समय लाग्ने भएकाले आवेदनबारे निर्णय हुनपनि लामो समय लाग्ने गरेको युएससीआईएसको भनाई छ । यो समस्याको समाधान संसदलेमात्र गर्नसक्ने युएससीआईएसले प्रष्ट पारेको छ ।
