दम्पत्ति र बच्चाबाहेक अरुलाई ग्रिनकार्ड नदिने बिल ल्याउँदै रिपब्लिकन सांसद
प्रकाशित मिति : चैत्र २०, २०८० मंगलबार
अमेरिकाको प्रतिनिधिसभाका केही रिपब्लिकन सांसदहरुले अमेरिकी नागरिक वा ग्रिनकार्डवाहकका दम्पत्ति र २१ बर्ष नपुगेका छोराछोरीबाहेक अरुलाई ग्रिनकार्ड नदिने बिल संसदमा ल्याउने भएका छन् । संसदमा अध्यागमनको विषय विभाजनको ठूलो रेखा बनिरहेको छ जसमा डेमोक्र्याटहरूले आप्रवासी मुद्दाहरूमा मानवीय केन्द्रित दृष्टिकोणको लागि जोड दिएका छन् भने रिपब्लिकनहरु बलियो सीमा सुरक्षा नीतिहरूमा जोड दिइरहेका छन् । यही अवस्थामा नयाँ बिल ल्याउन लागिएको हो ।
एरिजोनाका रिपब्लिकन सांसद एली क्रेनले अमेरिकालाई कानूनी अध्यागमनको दृष्टिकोणलाई परिवर्तन गर्ने बिल ल्याउन लागेका हुन् । क्रेन कन्जरभेटिभ फ्रिडम ककसका सदस्य समेत हुन् । उनले आफूले ल्याउन लागेको बिलबारे मंगलबार घोषणा गरेका हुन् ।
हालको परिवारमा आधारित ग्रिनकार्ड प्रणालीले अमेरिकाको अध्यागमन प्रणालीमा विदेशी नागरिकहरूको अनन्त शृङ्खलाहरूको परिणाम ल्याएको उनको भनाई छ । साथै आप्रवासीहरूका टाढाका नातेदारहरूलाई अमेरिकामा आउन र भिसाका लागि पर्खने क्रममा अवैध रूपमा बसोबास गर्न प्रोत्साहित गरेर अवैध आप्रवासलाई प्रोत्साहन दिएको उनको दावी छ ।
आफूले ल्याउन लागेको बिलले परिवारमा आधारित ग्रिनकार्ड केवल पति वा पत्नी र बच्चाहरूलाई मात्र सीमित गर्ने तथा अमेरिकामा परिवारमा आधारित ग्रिनकार्ड वा आप्रवासी भिसा जारी गर्ने तरिकालाई परिवर्तन गर्ने उनको भनाई छ । यसले बुढेसकालका आमाबाबुको हेरचाह गर्न विशेष परिस्थितिहरूमा अपवादहरूको लागि अनुमति दिने उनले बताएका छन् ।
हाल अमेरिकाले परिवारमा आधारित दुई प्रकारका आप्रवासी भिसा र ग्रिनकार्डहरू प्रदान गर्दछ। पहिलो अमेरिकी नागरिकका पति, पत्नी, २१ बर्ष ननाघेका बच्चा वा अभिभावकलाई आप्रवासी भिसा र ग्रिनकार्डहरू प्रदान गरिन्छ, जसमा बार्षिक कोटा छैन । अर्को अमेरिकी नागरिकका २१ बर्ष नाघेका छोराछोरी, दाजुभाई दिदीबहिनी, ग्रिनकार्डवाहकका दम्पत्ति र छोराछोरी लगायतलाई आप्रवासी भिसा र ग्रिनकार्डहरू प्रदान गरिन्छ, जसमा आर्थिक बर्षको सिमित कोटा हुनेगर्छ ।
एरिजोनाका सांसद एन्डी बिग्स, भर्जिनियाका बब गुड, इलिनोयका मेरी मिलर, फ्लोरिडाका बिल पोसे र मोन्टानाका म्याट रोसेन्डेलले बिललाई को स्पोन्सर गर्दैछन् । तर बिल प्रतिनिधिसभाबाट पारित भएपनि सिनेटबाट पारित हुन र राष्ट्रपतिले हस्ताक्षर गर्न भने सहज छैन ।