टेक्सासबाट न्युयोर्कका लागि कागजपत्रविहीनलाई नबोक्न बस कम्पनी सहमत
प्रकाशित मिति : चैत्र ७, २०८० बुधबार
बस कम्पनी रोडरनर चार्टर्सले बुधबार टेक्सासबाट न्युयोर्क सिटी र वरपरका क्षेत्रहरूमा आप्रवासीहरूलाई ढुवानी गर्न रोक्न सहमत भएको । न्युयोर्क सिटीले बस कम्पनीहरुविरुद्ध हालेको मुद्दा विचाराधीन रहेको अवस्थामा यस्तो सहमति भएको हो ।
न्युयोर्क सिटीले पछिल्ला दुई वर्षमा टेक्सासबाट बसमा हालेर न्युयोर्क ल्याइएका कागजपत्रविहीनको हेरचाह गर्न खर्च भएको ७ सय मिलियन भन्दा बढी रकमको माग तत्कालका लागि स्थगित गर्न सहमत भएपछि त्यसको भागका रुपमा बस कम्पनीपनि कागजपत्रविहीनलाई नबोक्न सहमत भएको हो । न्युयोर्क सिटीको डिपार्टमेन्ट अफ सोसल सर्भिसेजले डिसेम्बरमा रोडरनर र अन्य १६ बस कम्पनीहरूविरुद्ध मुद्दा हालेको थियो । कागजपत्रविहीन आप्रवासीहरूलाई न्युयोर्क सिटीको सरकारी सुविधा लिन बाध्य पार्ने उद्देश्यले टेक्सासका गभर्नरको योजना कार्यान्वयनमा सघाएको आरोप लगाउँदै बस कम्पनीहरुविरुद्ध मुद्दा दायर गरिएको थियो ।
कागजपत्रविहिनीको हेरचाहको लागि न्युयोर्क सिटीले गरेको खर्चका लागि बस कम्पनीहरु जिम्मेवार हुनुपर्ने दावी मुद्दामा गरिएको छ । जब टेक्सासले डिसेम्बर २७ र जनवरी ३ मा कागजपत्रविहीन आप्रवासीहरूलाई हालेर दुई विमानहरू फिलाडेल्फियामा पठायो, त्यतीबेला उनीहरुलाई फिलाडेल्फियामाबाट न्युयोर्क र न्युजर्सी ल्याउने रोडरनर प्रमुख बस कम्पनी थियो । नयाँ नियम अन्तर्गत न्युयोर्क सिटीमा कागजपत्रविहीन आप्रवासीहरूको कुनै पनि प्रकारको ढुवानीमा प्रतिबन्ध लगाइएको छ ।
न्युयोर्क सिटीले राष्ट्रिय मानवीय संकटको व्यवस्थापनमा राष्ट्रको नेतृत्व गर्न जारी राख्ने भएतापनि टेक्सास राज्यको हर्कतपूर्ण राजनीतिक खेलहरू नसहने मेयर एरिक आडम्सले एक विज्ञप्तिमा बताएका छन् । बसले मुद्दा अगाडि बढ्दै गर्दा न्युयोर्क सिटी र वरपर कागजपत्रविहीन आप्रवासीहरूको बस यात्रा रोक्न सहमत भएकोमा उनले खुशी व्यक्त गरेका छन् । उनले मुद्दा परेका सबै बस कम्पनीहरूलाई पनि त्यसै गर्न आह्वान गरेका छन् ।