पीडासँग लड्दै म्याक्सवेलले बनाए ऐतिहासिक दोहोरो शतक, अफगानिस्तान पराजित
प्रकाशित मिति : कार्तिक २१, २०८० मंगलबार
क्रिकेट इतिहासमा सबैभन्दा अविस्मरणीय रन चेस विश्वकप २०२३ मा मंगलबार राती देखियो । पीडासँग संघर्ष गर्दै ग्लेन म्याक्सवेलको अपराजित दोहोरो शतक हान्दै अष्ट्रेलियाले अफगानिस्तानलाई पराजित गर्यो र आफ्नो विश्वकप इतिहासमा सबैभन्दा ठूलो रनको लक्ष्य हासिल गर्यो। कुनै बेला खेल पूर्णतया अफगानिस्तानको पकडमा थियो । २९२ रनको लक्ष्यको जवाफमा अस्ट्रेलियाले १९ औं ओभरमा ९१ रनमा ७ विकेट गुमाएको थियो ।
तर, यहाँबाट ग्लेन म्याक्सवेलले आफ्नो करियरको उत्कृष्ट पारी खेल्दै १२८ बलमा अविजित २०१ रन बनाए । अर्को छेउमा उनले कप्तान प्याट कमिन्सको पनि राम्रो साथ पाए । मुम्बईको वानखेडे स्टेडियममा टस जितेर पहिले ब्याटिङ गरेको अफगानिस्तानले निर्धारित ५० ओभरमा २९१ रन बनाएको थियो । यो जितसँगै अष्ट्रेलिया सेमिफाइनल पुग्ने तेस्रो टोली बनेको छ । अफगानिस्तानका रसिद खान, अजमातुल्लाह ओमरजाई र नवीन उल हकले समान २–२ विकेट लिए ।
इब्राहिम जाद्रानको शतक व्यर्थ
यो विश्वकपमा अहिलेसम्म ब्याट्सम्यानका लागि वानखेडे रंगशालाको पिच स्वर्ग नै साबित भएको छ । यी तीन खेलको पहिलो इनिङ्समा क्रमशः ३९९, ३८२ र ३५७ रनको ठूलो स्कोर बनेको थियो । यसपटक पनि अफगानिस्तानका ब्याट्सम्यानले राम्रो खेले । ओपनर इब्राहिम जद्रानले अविजित १२९ रन बनाएर विश्वकपमा शतक प्रहार गर्ने पहिलो अफगान ब्याट्सम्यान बनेका छन् ।
जाद्रानले आफ्नो टोलीका हरेक ब्याट्सम्यानसँग साना–साना साझेदारी गरे । रहमानउल्लाह गुरबाज (२१), कप्तान हस्मतुल्लाह शाहिदी (२६), रहमत शाह (३०) अजमातुल्लाह ओमरजाई (२२) पछि अन्तिम ओभरमा रसिद खानले १८ बलमा ३५ रन बनाएपछि स्कोरबोर्डमा २९१ रन थपिएको थियो ।