एउटै चालक ४२ पटकसम्म कारबाहीमा
प्रकाशित मिति : श्रावण ६, २०७४ शुक्रबार
–
श्रावण ६, २०७४-
हिलटेक कम्पनीको नाममा रहेको को१क १८९ नम्बरको बसका चालकले ५० पटक ट्राफिक नियम उल्लंघन गरे । कहिले लेन अनुशासन मिचेको त कहिले फरक किसिमका हेलचेक्र्याइँ गरेको अभियोगमा कारबाहीमा परे । चालक फेरिए पनि बस चलाउने तरिका फेरिएन । जो आए पनि कारबाहीमा परिरहे । सोविन्द तामाङले चलाएको माइक्रोबसले ठक्कर दिँदा २ वर्षअघि नयाँ बसपार्कमा पैदलयात्री ४ वर्षीय अनुष तामाङको मृत्यु भयो । प्रहरी विवरणमा दुर्घटनाको कारण चालकको लापरबाही भन्ने प्रस्ट छ । तिनै सोविन्दले ट्राफिक अनुशासन उल्लंघन गरेबापत २७ पटक जरिवाना तिरे । तर, गाडी चलाउने सरकारी अनुमति पाइरहे ।
अर्जुन सेवाले चलाएको माइक्रोबसले किच्दा १ वर्षअघि चिकित्सकद्वय सन्दीप सुवेदी र सोनी आनन्दको मृत्यु भयो । नयाँ बानेश्वरस्थित विद्या संस्कार विद्यालयको विद्यार्थी बोकेको बा१य ४३ नम्बरको हरियो प्लेटको माइक्रोबस अचानक ब्रेक फेल भएर दुर्घटना भएको थियो । यसमा तीन किसिमका कमजोरी भएका थिए, पर्यटक बसमा विद्यार्थी बोक्नु, अति जीर्ण गाडी चलाउनु र पटके उल्लंघनकर्ता चालक हुनु ।
प्रहरी प्रतिवेदनमा उल्लेख भएअनुसार सेवाले लाइसेन्स लिएको ९ वर्षमै साना–ठूला गरी २६ दुर्घटना गराएका थिए । २०६३ मा वाग्मती अञ्चल यातायात कार्यालयबाट लाइसेन्स लिएको केही महिनामै उनले ठक्कर दिए र जरिवाना तिरेर निस्के । ट्राफिक प्रहरी महाशाखाका अनुसार लाइसेन्स लिएको ६ महिनाभित्र उनले तीनपटक जरिवाना तिरिसकेका थिए । २०६७ मा उनले १० पटकभन्दा बढी जरिवाना तिरे । २०७२ मा मात्र ५ पटक जरिवानामा परे । उनले २०६५ मा तनहुँको घाँसीकुवामा गाडी दुर्घटना गराउँदा एक जनाको मृत्यु भएको थियो । पुर्पक्षका लागि थुनामा रही छुटेको केही महिनामै उनले पुन:गल्ती गरेर जरिवाना तिरे ।
४ वर्षअघि बौद्धमा विष्णुबहादुर बलले चलाएको माइक्रोबसको ठक्करले मोटरसाइकल चालक भक्तबहादुर विकको घटनास्थलमै मृत्यु भयो । बल २० पटक कारबाहीमा परिसकेका व्यक्ति हुन् । बा१ज ९७६ नम्बरको ट्याक्सी चालक अष्टनारायण महर्जन ३४ पटक, बा२ख ९५ नम्बरको गाडीका चालक प्रकाश आचार्य ४२ पटक कारबाहीमा परे । प्रहरीले संकलन गरेको तथ्यांकका आधारमा आर्थिक वर्ष २०७३/७४ मा उपत्यकामा प्रत्येक दिन १५ सवारी दुर्घटना हुने गरेको देखिन्छ । चालकको लापरबाही, तीव्र गति, मादक पदार्थ सेवन, यान्त्रिक गडबडी, ओभरटेक, पैदलयात्रीको लापरबाही, तोडफोडबाट सवारी साधनको क्षति, सडकको अवस्था र मौसम तथा चौपायाका कारण प्रत्येक दिन उपत्यकामा सवारी दुर्घटना बढ्दै गएको प्रहरीले उल्लेख गरेको छ ।
सबैभन्दा बढी दुर्घटनाचाहिँ चालकको लापरबाहीले हुने गरेको छ । महाशाखाका डीआईजी मिङ्मार लामाले पछिल्लोपटक उपत्यकाको सडकको दुरवस्थाले गर्दा सवारी दुर्घटना बढेको दाबी गरे । ‘चालकले ओभर कन्फिडेन्टमा गाडी हाँक्छन्, तर सडकको अवस्था नाजुक छ,’ उनले भने, ‘सडकको अवस्था नबुझेरै गाडी हाँक्दा दुर्घटना बढेका छन् ।’ चालकको लापरबाहीले ५ हजार २ सय ५, तीव्र गतिले ४१, मादक पदार्थ सेवनले १ सय ६७ र यान्त्रिक गडबडीले गर्दा ५० दुर्घटना भएको प्रहरी तथ्यांकमा छ ।
‘दक्ष चालक पनि छैनन्, राजधानीका सडक पनि राम्रा छैनन्,’ डीआईजी लामाले भने, ‘त्यसकारण सडकको अवस्था पनि सुधार्नुपर्छ ।’ अस्वस्थ प्रतिस्पर्धाले गर्दा चालकले जथाभावी गाडी चलाउँदा दुर्घटनाको अनुपात बढेको उनको भनाइ छ । त्यसैगरी, ओभरटेकमा ३३ वटा, पैदलयात्रीको लापरबाहीले ४ वटा, सडकको अवस्थाले २१ वटा, मौसम तथा चौपायाका कारण ७ र सवारी साधनको तोडफोडले २ सवारी दुर्घटना भएका छन् ।
