जन्मदिनमा पूर्वराजा ज्ञानेन्द्रको सन्देशः हामी ब्यूँतन अब ढिला गर्नु हुँदैन
प्रकाशित मिति : असार २३, २०७४ शुक्रबार
पूर्वराजा ज्ञानेन्द्र शाहले पद प्रतिष्ठा र प्रशंसा भन्दा आफ्नो निरन्तरको चाहना देशभक्ति भएको बताएका छन् । निर्मल निवासमा शुभेक्षुकहरुसँग शुक्रबार ७१ औं जन्मदिन मनाइरहदा जन्मदिनको अवसर पारेर वक्तव्य जारी गर्दै शाहले आफूलाई शुभेक्षा प्रकट गर्ने र शुभकामना दिने सबैप्रति आभार प्रकट गरेका छन् ।
आफ्नो निरन्तरको चाहना देशभक्ति भएको भन्दै उनले भनेका छन्, ‘हाम्रा पुर्खाले जोडेको र जोगाएको यो देश सदा संरक्षित होस्, सदा सम्बृद्धिको बाटोमा अघि बढोस् मेरो मूल चाहना र कामना यही नै हो ।’
पूर्वराजा ज्ञानेन्द्रले देश जोगियोस् र विखण्डनमा नलागी सुदृढ राष्ट्रिय एकतातर्फ अग्रसर होस् भन्ने आफ्नो मनोकांक्षा रहेको बताए । ‘यस्तो भावना आम नेपालीमा र खासगरी राष्ट्रका जिम्मेवार जनप्रतिनिधिहरुमा रहोस् यही नै मेरो आग्रह हो,’ उनले भनेका छन् ।
राष्ट्रियता, सार्वभौमिकता र राष्ट्रिय एकता कायम गर्न सबै एकजुट हुनुपर्ने उनले बताएका छन् ।
साथै देश संकटमा पर्दा देशवासीले अभुतपूर्व एकता देखाउने गरेको र यसलाई सधै तयार हुनुपर्ने उनले बताएका छन् । पूर्वराजा शाहले भनेका छन्, ‘पूर्वीय दर्शनले विश्वलाई आकर्षित गरिरहेका बेलामा हामी भने कस्तुरी हराएको मृग झै शुन्यतामा हराइरहेका छौं । हामी कृयाशील ऊर्जा बोकेर बिउँतन अब ढिला गर्नु हुँदैन ।’
शुक्रबार जन्मोत्सवमा उनलाई शुभकामना दिनेहरु निर्मल निवास वरपर राजभक्तहरु झुम्मिएका थिए । राजसंस्थाको समर्थकदेखि पूर्वमन्त्रीहरु, प्रहरीका पूर्वअधिकृतसम्म हातमा पुष्पगुच्छा लिएर शुभकामना दिनेहरुको लाइनमा देखिन्थे ।
कतिपयले ज्ञानेन्द्र शाहको फोटो र ‘श्री ५ महाराजधिराज’ लेखिएको प्लेकार्ड बोकेका थिए । परम्परागत झाँकी र भेषभुषामा सजिएकाहरु पूर्वराजाको जयजयकार गर्दै त्यहाँ पुगेका थिए ।
आफ्ना समर्थकहरुको घुइँचो देखेर हौसिएका ज्ञानेन्द्रले विगतकै आफ्नो अभिव्यक्तिलाई निरन्तरता दिँदै पनि राष्ट्रियता, सार्वभौमिकता र राष्ट्रिय एकता कायम गर्न सबै एकजुट हुनुपर्ने धारणा सञ्चारकर्मीमाझ राखे ।
