नेपालले पहिलोपल्ट खेल्ने
प्रकाशित मिति : असार २३, २०७४ शुक्रबार
असार २३, २०७४- नेपाली टिम औपचारिक रूपमा अन्तर्राष्ट्रिय फुटसल प्रतियोगितामा ‘एएफसी फुटसल च्याम्पियनसिप २०१८ छनोट’ मार्फत् प्रवेश गर्ने भएको छ ।
एसियाली फुटबल महासंघ (एएफसी) को प्रतियोगिताको छनोटमा नेपाली टिम दक्षिण तथा मध्यक्षेत्रको समूह ‘ए’ मा परेको छ । क्वालालम्पुरमा बिहीबार भएको ‘ड्र’ मा नेपालले उज्वेकिस्तान, कीर्गिस्तान र तुर्कमेनिस्तान रहेको समूहमा प्रतिस्पर्धा गर्नुपर्ने भएको हो । यस क्षेत्रको अर्को समूहमा डिफेन्डिङ च्याम्पियन इरान, ताजकिस्तान र अफगानिस्तान छन् । समूह विजेता र उपविजेता च्याम्पियनसिपमा छनोट हुनेछन् ।
छनोटका खेलहरू अक्टोबर १३ देखि २० सम्म इरानको ताबरिजमा हुने अखिल नेपाल फुटबल संघ (एन्फा) ले जनाएको छ । एएफसीका पूर्व, पश्चिम, दक्षिण–पूर्वी र दक्षिण–मध्य गरी चार क्षेत्रमा छनोट सञ्चालन हुनेछ । प्रत्येक क्षेत्रबाट ४–४ टिम फाइनल चरणमा प्रवेश गर्नेछन् ।
सहरहरूमा खेल मैदान घट्दै गएपछि दशकयता राजधानी काठमाडौं तथा मोफसलका सहरी युवामाझ फुटसल लोकप्रिय बनेको हो । विश्वमा फुटबल संघ/महासंघ नै फुटसलको पनि सर्वोच्च संस्था हुन् । फुटसललाई पनि अन्तर्राष्ट्रिय फुटबल महासंघ (फिफा) र यसका सदस्यहरूले नियमन गर्दै आएको छ ।
फुटसलको विश्वकप फिफाले आयोजना गर्छ । एसियाली च्याम्पियनसिप एएफसीले सञ्चालन गर्छ । विश्वकप सन् १९८९ मा सुरु भएको थियो । ब्राजिलको वर्चस्व रहेको विश्वकपको आठ संस्करण भएको छ । यस प्रतियोगिता १९९६ यता चार–चार वर्षमा सञ्चालन भइरहेको छ । महादेशीय च्याम्पियनसिपको प्रदर्शनका आधारमा विश्वकपलाई टिम छनोट हुने गर्छ ।
सन् १९९९ मा मलेसियाबाट सुरु भएको एएफसी फुटसल च्याम्पियनसिप २००८ सम्म बर्सेनि आयोजना हुने गथ्र्यो । त्यसयता भने दुई–दुई वर्षमा हुँदै आएको छ । अहिलेसम्म इरान र जापानले अरु टिमलाई एसियाली च्याम्पियन बन्न दिएका छैनन् । इरानले सर्वाधिक ११ र जापानले तीनपल्ट उपाधि कब्जा गरेका छन् । एसियाली फुटसलको सर्वोच्च प्रतियोगिताले १८ वर्ष लाग्दा नेपालले पहिलोपल्ट सहभागिता जनाउन लागेको हो ।
राष्ट्रिय फुटसल लिग हुने
एन्फाले चार वर्षअघि नै बसन्त अर्यालको संयोजकत्वमा फुटसल कमिटी गठन गरेको थियो तर कमिटी निस्क्रिय रह्यो । गत माघमा उनलाई रमेश रायमाझीले विस्थापित गरेपछि एएफसीको सहयोगमा फुटसल कोचिङ कोर्स भयो । त्यसमा १९ पूर्वफुटबलर सहभागी थिए । निजी स्तरबाट भने नियमति प्रतियोगिताहरू भइरहेका छन् ।
१५ औं एएफसी फुटसल च्याम्पियनसिपको छनोटलाई नेपाली टिम तयार गर्न राष्ट्रिय फुटसल लिग गर्ने फुटसल कमिटी प्रमुख रायमाझीले बताए । ‘साउनमा फुटसलको राष्ट्रिय लिग गर्नेछौं,’ एन्फाका सदस्य रहेका उनले भने, ‘लिगमा बढीमा १६ टिमलाई खेलाउने तयारी भइरहेको छ । त्यसैबाट राष्ट्रिय टिमका लागि खेलाडी छनोट गर्नेछौं ।’