भारतमा पहिरामा परी तीन नेपालीको मृत्यु
प्रकाशित मिति : असार २२, २०७४ बिहीबार
![](https://i0.wp.com/www.khasokhas.com/wp-content/uploads/2017/07/4670086-Pithoragarh-0.jpg?fit=600%2C399&ssl=1)
भारतमा पहिरामा परी आज तीनजना नेपालीको मृत्यु भएको छ ।
भारत उत्तराखण्डको पिथौरागढ जिल्लास्थित धारचुला तहसिलको गर्बाधारमा पहिरो जाँदा जिपमा सवार तीन नेपालीको मृत्यु भएको हो । घटनामा अन्य दुई जना नेपाली घाइते भएका छन् ।
मृत्यु हुनेमा दुँहु गाउँपालिकाको पिपलचौरीका हिरादेवी बम, उनका अढाई वर्षीय छोरा ओमकार र १२ वर्षीया छोरी प्रियंका रहेका प्रहरी नायव उपरीक्षक केदार खनालले जानकारी दिनुभयो । उक्त घटनामा परी तीन भारतीय नागरिकको समेत मृत्यु भएको छ ।
घाइते नेपालीको भारतको धारचुलास्थित अस्पतालमा उपचार भइरहेको छ । भारतीय बाटो हुँदै दार्चुला सदरमुकाम खलङ्गा फर्किदै गरेका नेपाली पहिरामा परेका हुन् । रासस