सप्तरीमा तटबन्ध पुनर्निर्माणमा खटिए सेना र प्रहरी


प्रकाशित मिति : असार २१, २०७४ बुधबार

निरन्तरको वर्षाले जनजीवन कष्टकर

राहत एकद्धार प्रणालीबाट वितरण गरिने

शनिबारदेखिको बाढीका कारण सप्तरी जिल्लाका विभिन्न स्थानमा भत्केको बाँधको मर्मत र पुनर्निर्माणका लागि सुरक्षाकर्मी परिचालन गरिएको छ । महुली नदीको बाँध भत्किएर समस्यामा परेको मयनाकरेडी र लोहजाराको भेडिया बस्तीलाई जोगाउन बुधबार दिउँसोबाट नेपाली सेना, सशस्त्र प्रहरी र नेपाल प्रहरी परिचालन गरिएको प्रमुख जिल्ला अधिकारी कृष्णबहादुर कटुवालले जानकारी दिए । यस्तै खाडो नदीको तटबन्धअन्तर्गत तोपा र लौनियामा समेत सुरक्षाकर्मीले कटान नियन्त्रणको कार्य गर्ने उनले बताए ।

बढी दूरीसम्म कटान भएका स्थानमा जल उत्पन्न प्रकोप नियन्त्रण कार्यालयले आवश्यक तयारी गरी नियन्त्रणको उपाय गर्ने तर बाँध नबनाउँदा बस्ती नै सखाप हुने अतिसंबेदनशील स्थानमा बुधबारबाटै सेना, सशस्त्र र नेपाल प्रहरी परिचालित हुने प्रजिअ कटुवालले जानकारी दिए । परिचालित सुरक्षाकर्मीले कटान भएको स्थानमा जालीमा बोरा भरेर नियन्त्रणको कार्य गर्नेछ ।

शनिबार घरघरमा पसेको पानी सुक्न नपाउँदै मंगलबार बिहानवाट निरन्तर वर्षा भइरहेका कारण बाढी प्रभावित क्षेत्रको जनजीवन कष्टकर भएको छ । निरन्तर वर्षा भइरहँदा फेरि खोला नदीमा बाढी आएको र प्रभावित क्षेत्रमा पस्न थालेपछि सर्वसाधारण त्रसित भएका छन् ।


राहत वितरणमा एकद्धार प्रणाली

सप्तरीका विभिन्न खोलानदीमा आएको बाढीले प्रभावित क्षेत्रमा विभिन्न संघ संस्था तथा व्यक्तिले वितरण गर्ने राहतलाई व्यवस्थित गर्न एकद्धार प्रणाली लागू गर्ने भएको छ । जिल्ला विपद् व्यवस्थापन समितिको बुधबार बिहान राजविराजमा भएको बैठकले राहत वितरण गर्न आउने व्यक्ति र संघ संस्थालाई जिल्ला विपद् व्यवस्थापन समितिमा समन्वय र सम्पर्क गरी मात्र राहत वितरण गर्न आग्रह गरेको छ ।

यस्तै बाढी प्रभावितको तथ्यांक द्रूत गतिका संकलन गर्नका लागि स्थानीय तहलाई जिम्मा दिने निर्णय भएको छ । खानेपानीका लागि फिल्टर, हेण्ड पम्पलगायतका सामग्री युनिसेफसित माग गर्ने निर्णय विपद् व्वबस्थापन समितिले गरेको छ । यसै गरी विस्थापित भएका तथा प्रभावितहरुलाई प्रभावकारी राहतका लागि दातृ निकायहरुसित समन्वय र सहयोग लिने निर्णय समेत भएको छ ।

Source : Ekantipur

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com