Follow @khasokhasmag

मधेसी बहुल क्षेत्रमा एमाले


प्रकाशित मिति : असार २१, २०७४ बुधबार

असार २१, २०७४- मधेसी बहुल जानकी गाउँपालिकामा एमाले विजयी भएको छ । प्रारम्भदेखि नै पछि परेको एमालेले अन्तिममा आफ्नो पक्षमा परिणाम निकालेको छ ।

एक नम्बर वडाबाट सुरु भएको मतगणनामा संघीय समाजवादी फोरम र राप्रपाले अग्रता लिएका थिए । उक्त वडामा फोरमले नै अध्यक्षसहितको प्यानल जितेको छ । वडा नम्बर २ मा वडा अध्यक्षसहित माओवादी केन्द्रले जित्यो । अध्यक्ष र उपाध्यक्षमा फोरम, माओवादी र कांग्रेस प्रतिस्पर्धामा थिए । वडा नम्बर ३ को वडा अध्यक्षमा कांग्रेस र सदस्यमा फोरमले विजय हात पारे । ३ वटा वडाको मतगणना सम्पन्न हुँदासम्म एमाले चौथो स्थानमा थियो । मत परिणाम आफ्नो पक्षमा आएपछि कांग्रेस र फोरमका नेताहरूले विजयी हुने दाबी गरेका थिए ।

वडा नम्बर ४ को मतगणनासँगै एमालेले अग्रता सुरु गरेपछि मुख्य प्रतिस्पर्धी कांग्रेस बन्यो । माओवादी र फोरम तेस्रो चौथोमा झरे । वडा नम्बर ५ को मत गणनापछि कांग्रेसका उम्मेदवार छब्बन खानले १ सय मतले अग्रता लिए ।

उक्त वडा कांग्रेसको पकड क्षेत्र मानिन्छ । वडा नम्बर ६ मा मतगणनाको मध्यान्तरसम्म पनि कांग्रेसका उम्मेदवार खानले नै अग्रता कायम राखे । तर, अन्तिम समयमा आइपुग्दा एमालेका उम्मेदवार रामनिवास यादवले ७८ मतले पराजित गरे । वडा नम्बर ६ यादवको गाउँ हो । ‘अन्तिम समयसम्म कांग्रेसले अग्रता लिइरहँदा हारिन्छ कि भन्ने निकै डर लागिरह्यो । छाती ढुकढुक भयो,’ एमालेका समर्थक विषराम यादव भन्छन्, ‘धन्न चुनाव परिणाम आफ्नो पक्षमा आयो ।’

थोरै मतले कांग्रेसका उम्मेदवार खान पराजित भएपछि कार्यकर्ता निराश देखिन्थे । यसअघि अग्रता कायम गर्दा उनीहरू विजयी जुलुसको तयारीमा थिए । ‘जित्छौं भन्ने विश्वास थियो । थोरै मतले पराजित भयौं,’ कांग्रेसका रसिद खान भन्छन् । ६ वडा रहेको यस गाउँपालिकामा ३ वटा वडा अध्यक्षसहितको प्यानल र अध्यक्ष, उपाध्यक्षमा एमाललेले जित हासिल गरेको हो । अध्यक्ष/उपाध्यक्षमा एमालेका रामनिवास यादव र भूमिसरा धितालले जितेका छन् ।

उक्त गाउँपालिकामा ८० प्रतिशत मधेसी मतदाता रहेका छन् । करिब ३० हजार जनसंख्या रहेको जानकीमा १८ हजार ७८ मतदाता छन् । मधेसी बहुल मतदाता रहेका कारण संघीय समाजवादी फोरम नेपालले जितको दाबी गरेको थियो । तर, अन्तिम अवस्थामा मुख्य प्रतिस्पर्धी कांग्रेस र एमाले भए । कांग्रेसका खानले ३ हजार ६ मत पाए भने एमालेका यादवले ३ हजार ८४ मत पाएर विजयी भए । उपाध्यक्षमा पनि मतान्तर उस्तै थियो । राप्तीपारिको मधेसी मुस्लिम बहुल नरैनापुर गाउँपालिकामा भने फोरमले कब्जा गरेको छ ।

लमही नगरपालिकाको प्रमुखमा
दाङ– लमही नगरपालिकाको प्रमुखमा एमाले र उपप्रमुखमा कांग्रेस विजयी भएका छन् । प्रमुखमा एमालेका कुलबहादुर केसी ५ हजार १ सय ५२ मत ल्याएर विजयी भए । उनका निकटतम प्रतिद्वन्द्वी कांग्रेसका जोगराज चौधरीले ५ हजार ६९ मत प्राप्त गरेका छन् । उपप्रमुखमा कांग्रेसकी देवका बेल्बासे ५ हजार १५ मत ल्याएर विजयी भइन् । उनकी निटकतम प्रतिद्वन्द्वी एमालेकी मीनादेवी गुरुङले ४ हजार ८ सय ४३ मत प्राप्त गरेकी छन् ।

१० स्थानीय तह रहेको दाङमा हालसम्म नौ तहको मतगणना सम्पन्न भएको छ । त्यसमध्ये एमाले पाँच, कांग्रेस तीन तथा माओवादी केन्द्र एक तहमा विजयी भएका छन् । अब तुलसीपुर उपमहानगरपालिकाको मात्रै मतगणना बाँकी छ ।

रूपन्देहीको दक्षिणी क्षेत्र
भैरहवा– रूपन्देहीको दक्षिणी क्षेत्रका गाउँपालिकामा मिश्रित चुनावी परिणाम आएको छ । मर्चवारी र रोहिणी गाउँपालिकाको अध्यक्षमा संघीय समाजवादी फोरम नेपाल विजयी भएको छ । मायादेवी गाउँपालिकामा कांग्रेस, ओमसतिया गाउँपालिकामा माओवादी केन्द्र र समरीमाई गाउँपालिकामा फोरम लोकतान्त्रिक विजयी भएका छन् ।

मर्चवारी गाउँपालिकाको अध्यक्षमा संघीय समाजवादी फोरम नेपालका केशव कलवार ३ हजार ४ सय ५ मतका साथ विजयी भए । उनका प्रतिस्पर्धी कांग्रेसका ज्ञानप्रकाश मिश्रले २ हजार १ सय ६६ मत ल्याएका थिए । उपाध्यक्षमा संघीय समाजवादी फोरमकै सुनिता कलवार २ हजार ५४ मत ल्याई विजयी भइन् । निकटतम प्रतिद्वन्द्वी कांग्रेसकी श्रीकान्ति बरईले १ हजार ८ सय ३९ मत ल्याइन् ।

रोहिणी गाउँपालिकाको अध्यक्षमा विजयी संघीय समाजवादी फोरमका सनोज यादवले ३ हजार ७ सय ६० मत ल्याए । उनका प्रतिस्पर्धी राप्रपाका ताहिर अलीले ३ हजार ५ सय ४२ मत ल्याए । उपाध्यक्षमा राप्रपाकी श्रीकान्ति हरिजनले ३ हजार ४ सय ९६ मत ल्याएर विजयी भइन् । उनका प्रतिस्पर्धी संघीय समाजवादी फोरमकी रीना मिश्रले ३ हजार ४ सय ५० मत ल्याइन् । ओमसतिया गाउँपालिकाको अध्यक्षमा भने माओवादी केन्द्रका हीरा केवट (राहुल) २ हजार ४ सय ४२ मत ल्याएर विजयी भएका छन् । उनका प्रतिस्पर्धी संघीय समाजवादी फोरमका मञ्जित यादवले २ हजार ३ सय ११ मत ल्याएका थिए । उपाध्यक्षमा पनि माओवादी केन्द्रकै सुन्दरमति हरिजनले २ हजार २ सय ६४ मत ल्याएर विजयी भइन् । उनकी प्रतिस्पर्धी कांग्रेसकी अम्रिता उप्रेतीले २ हजार १ सय ७२ मत ल्याइन् ।

मायादेवी गाउँपालिकाको अध्यक्ष र उपाध्यक्ष दुवैमा कांग्रेस विजयी भएको छ । अध्यक्षमा ध्रुवनारायण चौधरीले २ हजार ८ सय १६ मत र उपाध्यक्षमा तारादेवी यादवले २ हजार २ सय १३ मत ल्याएर विजयी भएका हुन् । अध्यक्षका प्रतिस्पर्धी स्वतन्त्र उम्मेदवार रामआधारे यादवले २ हजार २ सय ५२ र उपाध्यक्षमा फोरम लोकतान्त्रिककी राजकुमारी चौधरीले २ हजार १ सय ६९ मत ल्याएकी थिइन् । समरीमाई गाउँपालिकाको अध्यक्षमा फोरम लोकतान्त्रिकका जितेन्दैनाथ शुक्ल ३ हजार ६६ मत ल्याएर विजयी भएका छन् । उनका निकटतम प्रतिस्पर्धी कांग्रेसका विनोदकुमार श्रीवास्तवले २ हजार १ सय ९६ मत ल्याए । उपाध्यक्षमा कांग्रेसकी कुमारी प्रियंका शाही सिंहले २ हजार ८ सय १६ मत ल्याएर विजयी भएकी हुन् । उनकी प्रतिस्पर्धी फोरम लोकतान्त्रिककी कमलावती अहिरले २ हजार १ सय ५० मत ल्याएकी छन् ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com