Follow @khasokhasmag

नेपालगन्जमा नारा– ‘हिन्दू-मुस्लिम भाइभाइ, धवलशमसेर हाईहाई’


प्रकाशित मिति : असार २०, २०७४ मंगलबार

असार २०, २०७४- हिन्दू राज्यको माग गर्दैआएको राप्रपाका मेयर उम्मेदवार धवलशमसेर राणाले मुस्लिम समुदायको निर्णायक मत रहेको नेपालगन्ज उपमहानगरपालिकामा फराकिलो अन्तरले जिते । मंगलवार अपरान्ह निस्केको राप्रपाको विजय जुलुसमा नारा लाग्यो, ‘हिन्दू–मुस्लिम भाइभाइ, धवलशमसेर हाईहाई ।’

झण्डै ६२ हजार मतदाता रहेको नेपालगन्जमा २३ वडा छन् । तीमध्ये राप्रपाले तीन वटा वडा मात्र जित्यो । तीमध्ये पनि दुई वडाध्यक्ष मुस्लिम समुदायका छन् । ‘मुस्लिम समुदायको राम्रो मत आएको छ,’ निर्वाचन परिचालन समितिका संयोजक ऋषिराज देवकोटाले भने, ‘राप्रपा र धवलशम्सेरप्रति सबै जाति र धर्म समुदायका नगरबासीले विश्वास गरेको परिणाम हो ।’ मुस्लिम बाहुल्यता रहेका अधिकांश वडामा मेयर राणाले अग्रता लिएका छन् ।

मंगलबार बिहान घोषित अन्तिम नतिजा अनुसार, मेयरमा राणाले १२ हजार ५ सय ५ मत ल्याएका छन् । उनका निकटतम् प्रतिद्वन्द्वी कांग्रेसका सुरेशकुमार कनौडियाले ८ हजार ७ सय ३० मत ल्याए । माओवादी केन्द्रका दामोदर आचार्यले ७ हजार १ सय ९८ र एमालेका सम्शुद्धिन सिद्धिकीले ६ हजार ९ सय ६५ मतमा चित्त बुझाए ।

त्यस्तै, उपमेयरमा कांग्रेसकी युवा नेतृ उमा थापामगर विजयी भइन् । उनले १० हजार ७ सय ३० मत प्राप्त गरेकी छन् । उनका निकतम् प्रतिद्वन्द्वी राप्रपाकी रमारानी गुप्ताले ८ हजार ९ सय २४ ल्याईन् । त्यस्तै, एमालेकी शान्तिदेवी ढकालले ७ हजार ७ सय ७३ र माओवादी केन्द्रकी कलामुन अन्सारीले ७ हजार ७६ मत ल्याएका छन् ।

विजयपछि मेयर राणाले सुन्दर, सफा र सदभावपूर्ण नेपालगन्ज बनाउने अठोट व्यक्त गरे । ‘यो मतलाई मैले नगरबासीको भरोसाको रुपमा लिएको छु,’ नवनिर्वाचित मेयर राणाले भने, ‘निस्वार्थ भावनाले काम गरेर त्यो भरोसालाई सार्थक बनाउने छु ।’

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com