छापामारदेखि गाउँपालिका प्रमुखसम्म
प्रकाशित मिति : असार २०, २०७४ मंगलबार
तीन मतअन्तरले विजयी
उनी २०५८ मा छापामारको रुपमा तत्कालीन नेकपा माओवादीमा संलग्न भएका थिए । उनी छापामार बनेको ४ वर्षमा माओवादीले हतियार बिसायो । छापामार बनेर जंगल पसेको १६ वर्षपछि निशान्त शर्मा यहाँको चिशंखुगढी गाउँपालिका प्रमुखमा निर्वाचित भएका छन् । चिशंखुगढी–१ काद ३२ वर्षीय शर्माको सानो छदाको नाम शम्भु बाँस्तोला हो ।
धेरैलै चिशंखुगढीमा माओवादी केन्द्रले जित्ने कुरामा शंका गरेका थिए । तर उनले निकटतम् प्रतिद्वन्द्धी एमालेका भीमबहादुर थापालाई ३ मत अन्तरले पराजित गर्दै त्यो शंका चिरे । प्रतिद्वन्द्धी थापाले १ हजार ९ सय ३ मत पाए । काँग्रेसका उम्मेद्वार टेकराज भट्टराईले १ हजार ८ सय ४ मै चित्त बुझाए ।
निर्वाचित भएपछि निशान्तले भने, ‘अब जिम्मेवारी काँधमा थपिएको छ । १६ वर्ष अघिदेखिका संकल्पहरु पूरा गर्ने चुनौति आएका छन् ।’ सुरुमा नेकपा मसालको अखिल क्रान्तिकारी विद्यार्थी संगठनबाट राजनीति गरेका शर्मा २०५८ बाट माओवादीका पूर्णकालीन सदस्य बने । उनले आफ्नो जीवन संगिनीलाई समेत २०६० सालमा जिल्लाकै मोलीमा प्रहरीसँगको भिडन्तमा गुमाएका थिए ।
अखिल क्रान्तिकारीको दुईपटक जिल्ला अध्यक्ष भएका शर्मा माओवादी केन्द्रको पछिल्लो अधिवेशनबाट निर्वाचित जिल्ला उपाध्यक्ष हुन् ।
यस गाउँपालिकामा संगठनको हिसाबले एमाले र कांग्रेस माओवादी केन्द्र भन्दा बलिया थिए । तर व्यक्तिगत लोकप्रियता र निरन्तर जिल्लामै बसेर राजनीति गरेबापत मतदाताले शर्मालाई विजयी बनाए ।