विप्लव समूहका ७ जना पक्राउ
प्रकाशित मिति : असार ६, २०७४ मंगलबार
असार ६, २०७४
विभिन्न ठाउँमा निर्बाचन विरोधी गतिविधि गरिरहेको आरोपमा भोजपुर र पाँचथरबाट अर्धभूमिगत नेत्रविक्रम चन्द ‘विप्लव’ नेतृत्वको नेकपा माओवादीका ७ जना कार्यकर्ता पक्राउ परेका छन् । विभिन्न समयमा पक्राउ परेका उनीहरुलाई निर्बाचन अवधिसम्मका लागि सार्वजानिक अपराध मुद्धा दर्ता गरी हिरासतमा राखिएको छ ।
दुई साताअघि भोजपुरको याङपाङबाट पक्राउ परेका माओवादी कार्यकर्ता जीवन राई र मानबहादुर राईलाई जिल्ला प्रहरी कार्यालयको हिरासतमा राखिएको छ । वास्तिम गाविसका भूपू अध्यक्ष समेत रहेका जीवन राई दशबर्षे जनयुद्धकालमा समेत माओवादीको सक्रिय कार्यकर्ता हुन् ।
अर्का कार्यकर्ता मानबहादुरसित सरकारी कार्यालयको साइन्डबोर्ड फालेर जनगणतन्त्र नेपाल लेखिएको बोर्ड राखिरहेको अवस्थामा उनीहरु पक्राउ परेको भोजपुरका प्रहरी नायव उपरीक्षक काजीकुमार आचार्यले बताए । माओवादीको भोजपुर इन्चार्ज लक्ष्मी तामाङ ज्ञानुलाई समेत असार ३ गते टेम्के मैयुङ गाउँपालिकाको खावाबाट प्रहरीले पक्राउ गरेको छ । उनलाई समेत जिल्ला प्रशासन कार्यालयबाट सार्वजानिक मुद्धा दर्ता गरी म्याद थप गरी जिल्ला प्रहरी कार्यालयमा पहरासतमा राखिएको छ ।
एक साताअघि पाँचथर प्रहरीले माओवादीका जिल्ला इन्चार्ज अर्जुन आचार्य सौगातसहित चारजनालाई पक्राउ गरेको छ । उनीहरुलाई समेत हिरासतमा राखिएको पाँचथरका प्रहरी नायव उपरीक्षक नकुल पोखरेलले बताए । पक्राउ परेका विप्लव समुहका कार्यकर्तालाई असार १४ गते निर्बाचन सम्पन्न भएपछि छाडिने बताएको छ ।